KA NUNNA HI PANGPAR ANGIN :
Kumin, 2023-ah hian he hla hi Puitling Lengkhawm zai intihsiakna tana hman leh tur a nih avangin 2015-a ka ziah tawh sa hi kan dahtha nawn ange.
Kumin, 2015 Bial SS Inkawmpuia Puitling Lengkhawm hla intihsiakna tur hi SSS No. 307 na niin JR Sweeney a phuah a ni a, Mizotawnga let/dahchhuaktu hi Luaia (1893-1967) a ni.
He hla phuahtu, John R. Sweney hi hla phuah tu a ni staliah mai lova, mite tan a hla mawi leh nun hnehtu phuah thin tu a ni. A hla leh rimawi siamte hian hmun hrang hrangah mi tamtak te sak a hlawh hle a, a hla te hi sak a nuamin a rimawi a nalh ani satliah lova, thiltihtheihna a keng tel hi a ropuina pakhat ani.
John R. Sweney hi West Chester ah December 31, 1837 khan a lo piang a, a naupan lai atang tawhin Music lama a theihna hi a lang chhuak daih tawh nghe nghe.Kum 19 a nihin German mi, Professor Bauer a hnuaiah rimawi a zir a, Violin leh Piano a zir bing a, hemi hnu hian Zaipawl hruaitu a tan thlan a ani ta nghe nghe a.
Kum 22 a lo nih chuan Band pakhat, The Third Delaware chu enkawlin a hnuah Sorkar lamin he Band hi an tihtawp sak hma zawng khan a enkawl a. Indonaah te pawh a kal zak zak hnuah Rimawi lamah let lehin Pennsylvnia Military Academy-ah Professor a ni ta hial a, he a thawhna hi a tawp hnuah Sweney's Cornet Band tih hming puin Pawl a din leh a, hei hi ram pumah a lar hle nghe nghe. 1869 a nih chuan Pennsylvania Military Academy ah an ko leh a, hetah hian kum 25 chhung a thawk ani. Kum 1876 ah Bachelor of Music Degree pek a ni a, 1886 Doctor of Music Degree pek leh niin kum 1871 atang khan inhlanna lam hla a phuah tan a, heng a hla te hi Hlabu pakhat, Sacred Songs & Solo (He hlabu ami lehlin leh a thluka phuah hi Kristian hlabu ah hian a tam em em) ah an dah nasa hle a, a ma phuah mai piah lamah a thluk a siam te a tam hle. Hun a lo kal zel hnu chuan ram chhunga hlaphuahtu lar ber te zinga mi a ni ta hial a ni.
Hla phuah mai nilovin ziah lamah pawh a thawhhlawk hle a, Lehkhabu 60 vel an tihchhuahah pawh Editor leh Associate editor a ni nghe nghe a. Kum 1899 April ni 10 khan khawvela a hringnun zinkawng chu a lo zawh zo ta a ni.
KA NUNNA HI PANGPAR ANGIN :
Chang khatna :
Ka nunna hi pangpar angin,
Reilotea'n a ral ang,
Zana Mumang, khua a var a
Aboral ang hi ani.
Thunawn
Aw ka thlarau vanah thlawk rawh,
Lei hi engah nge i ngaih?
I chatuan khawpui mawi pan la,
Mi thianghlimte khawpui chu.
Chang hnihna :
Khawvel nunna hi engnge ni?
Natna leh lungngaihna chauh;
Hlim leh lawm zawng zawngte hi,
Hlobet pangpar ang a ni.
Chang thumna :
Kan thian duh tak kalta te chu,
Hlim leh lawmin an thleng ta;
Lalthutthleng din hualin an zai,
Kan chatuan Lalpa fakin.
Chang lina :
A ropuina eng mawi tak chu,
NI aiin a eng mawi zawk;
Chutah ropuina hmaah chuanin,
Kan Lal Isua kan hmu ang.
Chang ngana :
Ka aw mawi neih chhun zawng zawngin,
Ka fak ang ka thlen hunin;
Thuro angin len thiam ila,
Ka thlawk ang ang Vanramah khian
Chang ngana thunawn :
Aw ka thlarau tunah thlawk rawh,
Khawvel hi kalsan tawh la;
I chatuan khawpui mawi pan la,
Khawpui mawi Lalpa ram chu.
