Thilpek pek dan tur thenkhatte

Bible ref. : Thufingte 3:9
“ I sumin Lalpa chawimawi la, i thil neih lo pung hmasa ber zawng zawngte nen.”

Mizo Kristiante hi thilpek/thawhlawm uar kan ni a, chung kan thilpek kan pek dan tur Bible a kan hmuh thenkhatte ka'n phochhuak ve reng reng teh ang, blog update khat manah inzirna nipah fawmin.

He thu hi a Saptawng Bible (The Message) ah chuan “I neih zawng zawngin Pathian chawimawi la, a hmasa ber leh a tha ber Pathian pe ang che” tiin a inziak a, kan Bible hmanlaiah erawh hi chuan “I sumin Lalpa chawimawi la, i thil neih lo pung hmasa ber zawng zawngte nen” tiin a inziak thung a. A hmasa zawk khi a fiah zawk bakah a ropui hmel zawk mahin keichuan ka hria. Pathian hian amah dah hmasak ber hi a phut a, chumai piah lamah kan rilru leh taksa chauh ni lovin kan neih sum a amah chawimawi turin Bible kaltlangin min ngen a ni.

Thilpek leh kan thawhchhuah hrim hrimah hian hmasa ber hi a hauh hrim hrim a, Lev. 23:9-14 kan chhiar chuan Israel fate khan an thlai leh Lova an thar reng reng Pathian hnena an hlan hma chuan an ei thainglo tih kan hmu a, chumai nilovin Numbers 18:8-14 kan chhiar chuan Hriak tha ber te, Grape tha ber te, buh tha ber te, rah hmasa ber te, an Lova hmin hmasa ber te Lalpa tana pek tur a nih thu kan hmu bawk a. Chuvangin Thilpek kawngah hian Pathian tan a tha ber leh hmasa ber hi dah tur kan ni tih hi kan hriat nawn fo a tul hle mai. Korinth khuaa Kohhran hote pawh hian a tlakcham lai takin Paula an tanpui a, an hnenah lawmthu a sawi nghe nghe kha.

Thilpek (Sum leh Pai rawngbawlna) reng rengah hian kan duhdan ngawt a pek chi leh pek tur a ni lova, pek dan tur leh tihdan tur erawh a awm a ni tih kan hriat reng a tha. Sawi tur tam tak awm mahse tlemte, chu pawh thluaithlum lem lovin thilpek pek dan turte thenkhat te i lo zir ho teh ang :

1. Thawh tam leh tlem hi a bang tam leh tlemah chhut tur a ni : Luka Bung 21 kan chhiar chuan Hmeithai rethei thawhlawm chungchang kan hmu a, kha hmeithai khan cheng tam tak a thawh lova, Dere lek a thawh a nih kha. Nimahsela Isua ngaihah chuan a thawh hnem em em. Engvang nge kan tih chuan a thawh kha a neih zawng zawng, a intun nunna tur liau liau a ni a, a bang a awm tawh lo a ni. Midangte erawh kha chuan an neih chuangliam an thawh a, an thawh bang kha tam tak an la nei a ni. Kan chanpual a tlem a, Pathian tana a tam zawk kan pek hian Lalpa a lawm a, a ngaihah chuan kan lo thawh tam mai thin a ni.

2. Ui lovin pek tur a ni : Rome 12:8 kan chhiar chuan Thilpek petu chuan ui lovin pe rawh se tih kan hmu a, chuvangin Pathian tana thilpel/thawhlawm kan pek reng rengin phal takin, ui hauh lovin kan pe thin tur a ni. Chu chu Bible min zirtir dan a ni tlat. Chutianga kan tih loh a, ui tak chunga kan pe fo a nih chuan Lalpa hi kan lakah a lawm lovang tih a hlauhawm a, phal takin i pe thin ang u.

3. Hlim takin pek tur ani : Pathian tan thilpek kan pek reng rengin hlim takin kan pe thin tur  ani. 2 Korinth 9:7 kan chhiar chuan Tirhkoh Paula’n “Pathian chuan hlim taka petu a ni a hmangaih ni” tiin a lo sawi a, chuvangin Pathian hmangaih nih kan duh chuan Thilpek kan pek reng rengin lungngai tak nilovin, tum buau chung pawh nilovin, nur nung chung pawh a pe lovin, hlim tak leh lawm takin kan pe thin tur a ni. Lungngai taka petu a hmangaih thu kan hmu lova, hlim taka petu a hmangaih thu kan hmu zawk a, chuvangin thilpek kan pêk reng rengin hlim takin i pe thin ang u. Tichuan Pathianin min hmangaih thei ang.

4. Pathian hnen thleng tlak turin kan pe tur a ni : Thilpek kan pek reng rengin kan hnaivaia tawp mai tura pek loh tur a ni a, Pathian hnen thleng tlak leh thleng ngei turin kan pe thin tur  ani. Tirhkohte Thiltih 10:4 thu kan chhiar chuan Sipai Zahotu Kornelia chanchin kan hmu a. A hnena Vantirhkoh rawn inlar khan he thu hi a rawn hrilh a, “I thilpekte hriat reng turin Pathian hmaah a thleng chho ta” tiin. He thu hi ka ngaihtuah thin a, a dawngsanwgtu tan hian a hluin a va lawmawm dawn em aw ka ti thin. Chuvangin thilpek kan pek hian pe mai mai lovin Pathian hmaa thleng tlak ngei tur leh thleng ngei turin kan pe thin tur  ani.

5. Pek tur dik tak pek tur a ni : Thilpek kan pek reng rengin pek tur dik tak, Pathian tan kan pe thin tur  ni. Chanchintha Luka 7:36-50 kan chhiar chuan Isua’n Pharisai Simona ina chaw a ei thu kan hmu a, khatah khan an khuaa mi Hmeichhe sual pakhat kha Isua bulah lo kalin Albasta bawmin hriak rimtui a rawn keng a, Isua bulah thuin a tap a, a mittui Isua ke phaha far chu a sama hruin a fawp ngawih ngawih mai a. Chu mai chu duhtawk lovin a hriak ken chu Isua ke ah chuan a hnawih ta a. Chung thil chu Simona’n a hmuh chuan “He nu hi hmeichhe sual tak a ni si a” tiin a Pharisai rilru dik tak chu a phawrh ta a. Nimahsela Isua’n zilhhau in hmeichhe hnenah chuan he thu mawi tak mai a sawi ta a. “I sualte ngaihdam a ni ta” tih thu hi. A dawngtu tan hian a va lawmawm dawn tehlul em! Engvanga kha hmeichhia khan sual ngaihdamna chang nge a ni kan tih chuan pan tur dik tak Lal Isua a pan a, a thil neih chhun kha tlawm mahse pek tur dik tak Lal Isua a pek vang a ni. Thawhlawm kan thawh hian Lalpa ni lova, kan mihringpuite tana thawhah kan inngai anih chuan lawmlo tak chung te, ui tak chungte in kan pe dawn tih a chiang reng a. Chutianga kan pek chuan kan thilpek hi Lalpa hnen thleng tlak a ni dawn lova, chuvangin kan pek tur dik tak, kan Pathian Lal Isua hi pe ila, hlim tak leh ui hauh loivn kan pe ang a, kan thilpek ah Pathian a lawm ang a, a hnen thleng tlak a lo ni mai dawn a ni.

Min duhsaktute