Karate Belt Exam

Kum 10 hnua han inthinpharh leh chu a hautak ngei mai...























Nitinin hmangaih che ka duh

Hun engemaw ti atang khan Chhim lam hla phuah thiam  C. Lalzarmawia hla hian  min hneh em em a, a satu Pensy B. Lalthangliani hian a lo sa thiam kher bawk nen, ka rilru a deng dawt thin. Chu hla chu Nitinin hmangaih fo che ka duh tih hla hi a ni.

Changkhatna :
Ka hun leh ni i rawngbawl na'n hmangin
Ka thiam na te leh theihn ka a hman lai hian
Sawichhiatna te leh elrelna ten min umzui chang awm leh thin
Mahse banzai reng ka rel theilo

Lalpa rawngbawl kan intih lutukna hian chapona ruamah min hruai theiin kan hria em? Nitin hian a rawng kan bawl tawk reng em? Kan theih leh thiamna hi Lalpa tan kan hlan tak meuh maw? Heng zawhna hi a lo lut zut zut a, chhan erawh a va har si em! Engemaw hleka lungawih loh leh tih tauh mai te hi a lo va awl em ve aw...  Chutiang nun nei chu ni mah ila Lalpa tana inhmang leh Lalpa rawngbawl tak tak tu chuan sawichhiatna, elrelna, hmuhmawhna, thikna, etc. te hian a tihnual lo mai nilovin chakna atan an lo hmang zawk hlauh thin anih chu! Chung chuan an rawngbawl a thulh tir thei lova, Lalpa rawngbawlnaah banzai an rel ngailo a lo ni reng mai. Pathian rawngbawlnaah hian a nuam ringawt hian a daih seng lova, a changin a nuam ang a, a nuam em em ang a, nuam tak a ni ang. Chutiang reng erawh a ni lo fova, chaklohna lang tur tam tak hian ringtu hi a lo hmuak ve reng mai a, chung kara Lalpa rawngbawl thulh duh miah lo te chuahvin HNEHNA HLADO an chham thei thin.
A thunawn :
Nitinin i aw hriat fo ka duh thin
Nitinin i hmel hmuh fo ka duh thin
Ka bosan loh nan che
Nang ka hloh loh nan
Nitinin hmangaih che ka duh

Nitin zan tin hian Lalpa aw hriat kan chak em? Hriat tumin kan bei em? A aw hre tlakin kan nung reng em? A hmel hmuh te hi kan lo hlau ru thum mai lo maw? Heng zanwg zawng hi ringtu tak tak te chuan an lo chak thin. Lalpa tel lova kawngbo a awlsam zia te, chak loh leh tluk mai hmabak an nih zia te, mahni theihna emaw tia rawngbawl mai a awl tur zia te, chatuan nun hlatsan a har loh zia te an hre chiang em em a, chuvang chuan Nitinin Lal isua hmel hmuh a a aw hriat an chak thin a lo ni. Engtik lai mai pawh hi Lalpa nen hman loh an hlau em em thin a, an nun hruaitu tak tak leh kawng kawhhmuhtu atan an lo thlng thin. Lalpa an theihnghilh loh na’n leh kawngdik  an pen bo san lohna turin nitin Lalpa an lo hmangaih zual zel thin. Chu nun erawh chu RINGTU TAK TAK tan ni. Lapa hi kan lo theihnghilh zeuh zeuh ang a, nilo; kan hrechhuak zeuh zeuh anga, phur chang chauh a aw hriat tum leh a hmel hmuh duh RINGTU kanni ang tih a hlauhawm hle.

Chang hnihna :
Nang fak nan hian ka hun leh ni hmangin
Ka theihna te hi hlan leh chuan ka thiam lo
Mahse i ropui hmangaih vanga fak tur che ka nihna hian
Min delh thin ka va duh khawp lo em.

Lalpa kan fak tawk viauin kan inhria em? Lalpa chawimawi a awm theihh na’n kan inpe tawk tak meuh maw?  Kan theihna zawng zawng te hi a zo tawhin kan inhria em? Lalpa tana inpe tak tak te chuan an inpekna an duhkhwap ngailova, a aia tam pek leh zel an duh thin a nih chu mawle!! Lalpa hi engvanga fak tur nge kan nih le? Engtiang taka faka chawimawi tur nge kan nih? Pathian hmangaih tak taktute chuan an inpekna an thlir a, an sit em em a, an duhkhawp lova, engtik lai pawhin Lalpa tan inpe thin mahse tlem an ti a, a aia tam a pek an duh nachungin a tihhdan tur an thiam tawh loh thinna chuan an nun a ti nguai thin zawk a lo ni!! Kan va inang lo em ve aw... Kan Pathian hi a ropui em avang leh hmangaih tawp lova min hmangaihtu awmchhun anih avangin fak a phu a ni tih an hre chiang a, nimahsela an theihna an enin an induh khawp lo thin mai zawk a ni.

Chang thumnna :
Miten engtin min chhiar maw ka hre lo
Keimah ka inchhiar ka tling thei mawlh silo
Ka bansan thei lo i hnung zui hi i rawngbawl ka thulh thei lo
Ka duh ber Lalpa nang chauh i ni

Mite min ngaihdanah kanbuai viau em? Mite kan teh uluk viau thin em? An tlinna aiin an tlinlohna leh thatlohna lai kan hmu lian zawk fo thin lo maw? An theihtawpa an rawngbawlna te pawh intih engemawnaah te kan lo ngaihsak thin em? An rawngbawlna te kan lo ei lo viau mai lo’ng maw? Anih loh leh, miten kan chanchin an sawi dan kan buaipui viau em? Fak emaw sawisel emaw kan nih leh nih loh kan ngaihtuahnaah a lian ber fo thin em? Krista hmangaihtu tak tak te chuan miten an chanchin an sawi danah an buai lo. Lalpa rawngbawl a, Krista hnungzui an nih an inhriat chian avangin midangten an ngaihdan tur lam aiin Lalpa’n a ngaihdan tur zawk an ngaihtuah tlat thin. Chutiang nimahse, mihring an nih ve tho avangin an mahni lam an inteh zawk fo va, an in chhut thin a, tlinglo an inti em em thin. Tlinglo hle niin inngaiin inhre mahse, Lalpa chu an duh leh hmangaih ber a nih miau avangin a rawngbawl leh a hnungzui an chawlhsanin an ban san phal chuang lo a nih chu! 

Tlinglo chung pawh a tling min pawmtu chu kan Pathian, Lal Isua hi a ni a, nitin zantina hmangaih hi kan tih tur a ni. Kan tih tur kan hlen ve don lo’m ni?

Ka mamawh LALPA

Kan nun hi tihian kan hmang ve reng a, kan ngaihtuahnain kan nun dan tur kan hisap a, kan duhdanin kan awm emaw tiin ngaihtuahna kan seng nasa thin hle. Naktuk ani emaw, kumtawp lam a ni emaw, hun thawl tha deuh a ni emaw, kan duhdanin ruahmanna kan siam a, chu chu hlawhtling ngei ngei turah kan han ngai ngawt zel a!  Heng zawng zawng kan tih theihna phena thil awm erawh ngaihtuah lo tam tak kan awm ngei ang.
Pathian chibai buk hi a namai lova, thawka phita tih ve tawp chi pawh a ni hek lo. A ngaihdamna chang tur leh a rilru tak tak hneh tur chuan kalpah biak mai chi a ni lova, tlanpaha auh mai chi lah a ni hek lo. Lalpa kan pan anih chuan kan thinlung kan hlan tel a tul khawp mai.  Kan nun sual hi Lalpa hnenah kan puan chhuah a, a hnen ata damna leh chawlhna chang tura kan pan a tul hle. Mihring Kan ngaihtuahna a fumfe loh chang hi a tam em em a, ngaihtuahna buai tak kan neih hun te pawh a thleng thin. Pathian lama kan kal lohna tur nuam zawk leh hlimawm zawk nia lang te a tam em em a, a awlsam hmel thin bawk si a. Chung hunah chuan kawng dik thlan a harsa a, Pathian a innghat tak tak lo tan chuan Piantharna hian rei a daih thei lo. Pathian hi kan nun hruaitu tak tak atan kan thlang a kan hmang a nih loh chuan kan kawng zawh hian chatuan nunna hmun min thlen lovang.

Lord, I come, I confess
Bowing here I find my rest
Without You I fall apart
You're the One that guides my heart

Engtik lai pawhin Pathian hi chu kan mamawh asin! Kan mamawh tih kan inhre lo mai pawh a! Ani chu min humhimtu a ni a, miten  misual bera min ngaih lai pawha kan felna min hmuhsak tlat tu a ni a sin. Kan nunhlui chhuan tur leh sawichhuah leh tlak awm lo pawh hi kan thiante ngei pawh hian sawichhuah nuam an ti fova, Pathian erawh chuan min sawichhuah nawn sak ngailo mai nilovin min hriat reng loh sak fo \hin. A tellova nung emaw kan intih lai te, min hmulo emaw kan tih lai te, min hrelo emaw kan tih lai hun zawng zawngah pawh ani chu kan hnenah a awm reng thin. 

Lord, I need You, oh, I need You
Every hour I need You
My one defense, my righteousness
Oh God, how I need You

Ruih theih thil timi tan nghei tum hun lai tak hian a thlawna neih tur a tam duh an ti. Tak tak nimaw! Sum ani emaw, bungrua a ni emaw, dik lo deuh mahse mamawh lai tak hian hmuh tur a awm ve chawk bawk a. Nu leh Pa tam tak tan nula leh tlangval nia insawi mai chak hun a thleng lo thei lo fo bawk thin. Chung hunah chuan Pathian kan mamawhna hi a lo nasa ngawt thin mai. Kan inthenawm khawvenna te, kan khawtlang nun te, kan inthian thatnaah te hian kan duh loh lam thil te pawh a thleng fova, mihring nihna hian min hneh \hin avangin chungchu tih chhiat mai duh na rilru put te pawh a awl thei hle awm e. Nimahsela, Pathian lam kan ngaihtuah a, kan innghah ngam phawt chuan dam takin kan awm leh thei a, buaina kan pumpelh thei fo bawk. Thlarauthianghlim(Pathian) awmna hmunah Zalenna a awm thin si a. (Pawngtawng zalenna a nilo tih erawh hriat tur).

Where sin runs deep Your grace is more
Where grace is found is where You are
And where You are, Lord, I am free
Holiness is Christ in me

Pathian fak mai hi kan tih tur a nih lai hian a va harsa si ve le! Harsatna kan tawh te, kan \ah chang te, chhiatna a lo thlen hun te, thihna kan tawh lek phei chuan... Dik tak chuan pawnlanga fak mai leh Pathian hnena lawmthu sawi mai hi chu a har miah lo, nimahsela thinlung chhung hian a fak tak tak thei lo ni hian ka hre \hin. Pathiana beiseina chhete neitu tan pawh a har chuan beiseina nei tak tak nei lo tu tan phei chuan a harsa hian ka ring a. Beidawnna te, malsawmna dawng ve miahlo nia inngaihte, hmangaih loh bik nia inngaihte hi a lo va awl dawn tak em!!! Hlimlai chauha Pathian hriat chhuah hi a lo awm thei dawn khawp mai. 

Teach my song to rise to You
When temptation comes my way
And when I cannot stand I'll fall on You
Jesus, You're my hope and stay

Chuvangin kan engkim maiah hian PATHIAN kan mamawh em em a ni. Mamawh miahlo nia inhria  te hlei hlei hian kan mamawh leh zual ni hian ka hre thin.

(He hla hi ka letling thiam lo naa, ka ngaihthlak apiang hian Pathian ka mamawhna nasat zia ka ngaihtuah chhuak thin. Chu chu ka nuna thu a sawi dan a ni a, ka ngaihtuahna zawng zawng erawh ziahchhuah a va harsa si em!!)

Min duhsaktute