Dt. 21.10.2020
Ram pumah harsatna kan tawk a, eizawnna leh nunphung thlengin a khaihlak a,
Kohhhran inkhawm a huaihawt theih loh a, engemawti chhung phei chu hnatlang koh pawh a rem lo hial a. Kan nitin nun a buai a, kan tih than loh tam tak tih thar a tul a, ei leh in man thlengin a danglam a, chung karah chuan thlaphanna tur a awm leh zeuh thin nen. Nun a ralmuang lova, fimkhur taka khawsak a lo tul ta. I chi-ai em? I mangang thin em? I rilru a hah ngawih ngawih thin em? Hlauhthawnnain i khat thin em? Awm hle hle phawt mai teh, tidamtu Isua Krista a awm asin.
A hmangaihna chu Tuifinriat ai pawhin a thuk zawk a, a zahngaihna chu a mamawhtute lakah a hlawhchham ve ngai lo. A ban tha chak chu chak lo zawkte tan inhumhimna kulhpui a tling a, rinna nghahna tlak a tling asin! I rinna kha tinghet leh rawh le. He thil hi miin a hriatchian chuan a rinna chau tawh pawh a tungding tha leh thin.
Kan rinnate hi a chau ve fova. "A lo thleng dawn lo a ni ang" tiin a zuai hman fova, beidawnna a lo thleng fova, chuta tanga ring tha leh tur chuan a lo harsa hle tawh thin. Nimahsela, miin Pathian a hmuh fiah tlat chuan chutiang dinhmun atang pawh chuan a lo tho chhuak leh thin a, a rinna chu a rawn siamtha leh thin. "Nangmah ring turin i lamah ka lo phar a, ka inhumhimna ka chakna i ni tih ka hrechhuak leh a, ka thinlung hi a lo hlim leh thin a, ka Pathian chu chatuan atan i rinawm si" tiin Pathian an fak leh nge nge thin.
I thlarau nun a beidawng em? Da riauin i inhre thin em? Nge i lo da tak tak zawk? Thlarau lam tuikhur a kang (khawro) ta niin i hre thin em? “Kan rau lo si” tiin beidawnna thinlung i pu hial tawh em? Chutiang karah chuan hei hi theihnghilh ngai lo la. Hahdam takin awm rawh. Kalvari atanga tuinung lo chhuak kha a la pangngai reng a, i nun theihna tura Lal Isua thisen chhuak leh a nun a hlanna kha a la pangngai reng a. Amah ngeiin a sawi angin TUINUNGLUI a nihna hi a la nung reng fova, rawn beiseiin rawn pawh thar leh ta che. I rinna kha tichak thar leh rawh le.
Kan thlarau nun tithar leh turin tawngtai taima ila, Bible chhiar uar ila, kan chaklohna ata chakna thar nei fo turin inbuatsaih ang u. Hetiang tur hian i tan remchang takin zan tin Biak Inah tawngtai inkhawm a awm thin a, zing tawngtai an awm reng a, nagmah chauha i theih loh kha a huho chuan i thei maithei asin. Vawikhat tê chauh pawh han chhin ve mah teh.
Kei erawh chuan LALPA lam ka en ang a; ka chhandamna Pathian chu ka nghâk ang: ka Pathian chuan mi ngaithla dâwn a ni. - Mika 7:7
(Chris Tomlin-a hla, I lift my hands tih ka ngaihthlak atanga ka rilru-a lo awm chul mam tawh lem lovin ka han chhu chhuak ve nawk nawk a ni e)
