PENTECOST MITE RAM TUR

PENTECOST MITE RAM TUR

Phuahtu - Evan. Zoremmawia Hlondo

Khua zawng laia'n kan sakhming-

Pentecost rálhrât a bo thiang lo'ng.

Chutiang tura koh kan ni si.

Pathian pakhat, minung pakhat chauh-

Isua Krista zara tihhuaisen kan ni e.

Pentecost Nulâ,

Pentecost Tlangvâl,

I silhfen leh i nun uluk thar ta che.

Silhfen azawnga hlu leh mawi ber,

Nun azawnga duhawm ber mai,

Isua Krista ngei hi i mawipui ber a nia.

Thuthlung aia kawppui thlang zawkte ai hian,

Thuthlung vanga lenrei huamte hi kan ngaisang fe zawk a nia...

Nang, PYD,

Pentecost thalai nih i tling meuh maw?!

Krista tana sengkhawmtu tur kha sengkhawm ngai zawk i lo ni hlauh ange.

Social Media vangin i zahawmna tichhe ngai suh la, 

Camera hmaah inkhuh mawi hram hram thin ang che.

Entertainment aiin thutak tui pui zawk la,

Materialism aiin thlarau rawngbawlna dah lal zawk fo vang che.

Tawngkam fei kibar hmangin i unau titlu ngai suh la,

Sawiseltu aiin siamthatu dinhmun a ropui tih theihnghilh ngai suh.

I nun, i incheina, i mobile phone a changkang angin,

Thuthlung mawlh kha changkan pui tlat ang che.

Pentecost Nu leh Pa te u,

Nova ianga chhungkua chhandam tur hian;

Theihtawp bakah tlêm  belh a hun ta.

Chatuan boralna tui fawn hlup hlup mah se,

Chhandamna lawng i tuk khan in chhungkua chawikang zel se;

In Zion lawnglian chu Lalpa tlangah a la innghat ngei dawn si.

Ruihhlo, zuk leh hmuam, mipat hmeichhiatna hman khawlohnaten lem vêl che mahse,

Eiruk, hlemhlêt, duhamnaten kawppui atan sawm che mahse,

Ram tuktin par tlukin lo vul thin mahse,

Thianghlimna silhfen mawipui reng la.

I zawh tura duan, i zawh ngei tura duan thianghlimna kawngpuiah chuan;

Aw, Pentecost mi,

I hlimthla chuan zui chein, a cheimawina pawh mi dang ni lovin, i hniak ngei lo ni se,

Thianghlimna leh i nun chu kawp tura duan ni tlat rawh se.

Nang, Pentecost Naupang,

I hma hun innghahna chu Bible ni sela,

Thuthlung hmanga chawm seilen lo ni la,

I ke pen tin chuan Chhandamna leh chhandamtu pan zel se,

Isua Krista kiangah i la lâm dèr dêr dawn nia...

Lalpa'n malsawm rawh se.

KUM 2025 BEIHRUAL THUPUI BU CHIP ZUAI ZUAI ANG AW….

KUM 2025 BEIHRUAL THUPUI BU CHIP ZUAI ZUAI ANG AW….

Zorema Hlondo

 

UPC (NEI)-in kumina kan Beihrual thupui zirtir bu chu Dt. 6.8.2025 khan tlangzarh a ni a. Kan Gen. Hqrs. Offset; Lynden Offset Press-ah chhut niin Copy 9500 siam a ni a, a man hi bu khat Rs. 50/- a ni.

 

Kumin Thupui hi Ringtu leh Kohhran tih niin Rev. VL Dika Sailo ziah a ni a, Thupui 21 dah niin Missionary Day zan lam hun pawh tualchhung kutah dah a nih thu tarlan a ni a. Literature & Publication Board, UPC (NEI)-in a published a ni. Ziaktu leh buaipuituten fak mawlh mawlh an phu.

 

Chhuahtu thu hmahruaia tarlan angin a ziaktu hi Kohhran hruaitu hlun, dinhmun pawimawh tak tak chelh tawh, tawnhriat ngah tak a nih zia a thuziahah a langin a hriat a. Thupui hrang hrangte hi zir ninawm lo tawk vela thui niin a bengvar thlak hlawm hle. Thupui tinah sawiho tur dah a ni a, kan sawihona ringawt pawh a ngaihthlaknawmin a hlawk thlak leh viauin a rinawm. Thupui thenkhatah lehkhabu ràwn tarlan a ni hian he lehkhabu hlutna hi a tipung a nimai lo va, a ti rintlak leh zual a ni.

 

A ziaktuin hah takin, thahnemngai takin a ziak ang a, endiktu pawlten uluk leh ngunthluk takin an endik dawn tih a chiang reng a. Thupui inchhawp dan pawh a tha viauin a lang a. A ziaktute leh enfiahtute inpekna hmuh hmaih theih a ni lo vang. An thiamna themtê pawh ka pha hauh lo nachungin tlem azawng han sawinawi châk ve deuh ka nei a. A hrana zir leh thiamna bik nei ka ni hauh lo nachungin, chhiar châkna thinlung kan lo neih phah mial takin tun tum chu thui tawk tak maiin i’n chip chhin teh ang. A ziaktu leh endiktu, chhuahtu lam demna a awm lo va, an rilru ka lo tihnat chuan ngaihdam ka dil nghal e. He thuziakah pawh hian hawrawp chhut sual leh dik lo pawh a awm ve tho awm e a…

 

SAWINAWI LAM:

1.      A bu hming chhut dan/dah dan a inang lo:

A kawma a bu hming an dah dan leh phek hnihnaa an dah dah hi inang se a mawi leh zualin a rinawm. A kawmah hian Beihrual Thupui 2025 a intih laiin a chhungah hian 2025 Beihrual Thupui Bu a inti thung a.

 

2.      Ziaktu thuhma chin hi number pek dan pangngai ni lovin, roman number hman ni se a fuh zawk angem aw...

 

3.      Ziaktu thuhma para hnihnaa Pathiaan tih hi Pathian tih zawk tur niawm tak  ni a, hei hi editing board lamin an hmuh hmaih palh a ni maithei.

 

4.      Thupui hmasa bera Bible-a hming pawimawh leh lar deuh mai lo lang hi Mizo tawng bible-ah chuan Oholiaba tih a nih laiin hetah hian Oholioba tia dah a ni a, en hmaih palh emaw, hmuh kan palh pawh a ni maithei e.

 

5.      Bible bung leh chang ziah dan thar kan hmuh rualin a ziah dan hi inang tlang thei se hmuh a nuam leh zual ang. A tlangpuia kan ziah thin danah hian bung leh chang thenhranna atan colon (:) kan hmang thin a, thupui bu-ah hian fullstop (.) an hmang tam zawk a, kan ziah dan thin loh ang deuh a nih vang nge mit a la deuh hlek a. Hetia ziah a nih dawn chuan a vai hian fullstop hman law law ni ta se a hmuh a nuam leh zualin ka ring. A ziah dan inang tlang se tih a nih ber chu!

 

6.      Phek 18-naa Pathian rama lut turin eng nge ka inhmun tih i inen fiah fo ila tiha INHMUN tih hi DINHMUN tih tur a nih ka ring a, chhut sual; enfiahtu lamin an lo hmuh hmaih ve leh zel a nih ka'n ring ngawt a. Tin, i tih hi a chuangtlai em aw ka ti a, inen fiah fo ila tih mai kha a mam zawk mah em aw ka la ti fan mai. Hmun dangah pawh ka hmuh belh zeuh zeuh. Tin, phek 65-naah pawh “mipui tâna a ni ang a” tih a awm a, tân tih dawta a lo awm zeuh hi chhut sual a nih a rinawm a, endiktute lamten uluk taka an en chungin an hah  deuh tawhin an hmuhkân pawh a ni maithei e.

 

7.      Kohhran tih rau rau a thena K lian hman, a thena k tê hman hian hmuh a tinuam lo deuh ka ti. A lian hman chuan a lian vek, a tê hman chuan a tê vek hman ni thei se.

 

8.      Chutichuan tih hi Bible-ah hian a inzawm vek thin a, Mizo tawng zirlaibu-a kan zirlai thinah pawh inzawm tura tia kan zir thin kha a ni a, inzawm loh ka hmuh tlat mai. Chuvangin tih pawh hi a inzawm lo ka hmu nual mai a, inzawm tur niawm tak a ni. Chuvang chuan tih tur niawm tak, chu vang chuan tia ziah pawh a awm.

 

9.      Lo ang ti a inziak ka hmu nual a, hei pawh hi sikul kan kai ve lai kha chuan lo vang tiin kan zir thin a. Engpawh nise, thil a danglam a, thil thar a chhuak zel a, v tel lo hi a dik zawk pawh a ni mahna le. Lo va tih pawh hi a thena zawm, a thena zawm loh ka hmu.

 

10.  TE tih hi thui deuh chip bîk ang. A thenah a inzawm a, a thenah zawmna tura ngaihah a inzawm lo va. Tin, hnam dang tawng (Saptawng, etc.) dawta dah dawnin hyphen (-) dah thin tur tia kan lo zir thin kha a thenah dah a ni a, a thenah dah a ni lo thung a. Thuhnungbet (suffixed) a nih avangin thuzawmna (conjunction) atan hman a nih chauhvin a hranga ziah tur tihte kha kan zir a. Grammar chungchangah inhnialna a tam bakah, hriat dan a inang lo thei hle tawh niin a lang a. Engpawh nise, an hman dan hi a inan loh nuai (h) avangin fimkhur tawk loh a ang mah em aw chu ka ti a. A hman dan tur dik zawk pawh a lo ni thei tho bawk a, thumal dang aia a tam bik avangin a langsar deuh bik êm a, ka'n chip thui lui vel a nih hi. Ringtute tih pawh hi a inzawm leh zawm lo a awm.

 

11.   Van ram tia ziah hi Bible-ah hian Vânram (inzawm) tia ziah a ni a, a dik zawk hmel chuan ka hria.

 

12.  AH tih; thuhnungbet pawh ziahzawm loh ka hmu a, fimkhur hret a ngai chuan a langin ka hria.

 

Mithiam zawkten sawi tur an ngah ka ring a. Kan thupui an thlan hi an thlang fuh hle mai a, kan mamawh tak ni pawhin a hriat a, uluk taka zir erawh kan ba ve thung a ni.

 

FAKNA LAM VE THUNG:

A kawm pawh kan Kohhran rawng; a pawl hman a ni a, a fuh hle mai a, logo pawh a dik thlap e.

 

Bung 2-naa sap tawnga CHURCH kan tih, Mizo tawnga Kohhran tih leh Biak In tihna atana kan hman a rawn chhui zau leh a rawn sawifiah hi a bengvarthlakin hriatna a tipung hle mai. Hemi bungah vêk; Kohhran tih hi Pâwl (Organisation) satliah mai a ni lo va, Pathian aiawha khawvela awm a ni a ti hian Kohhran hlut zia leh pawimawh zia a tarlang chiang hlein ka hria.

 

Kohhran dinhmun san zia sawifiah a, thawktu inruat leh lâk kawngah pawh khawvel thila hna anga mawi lo leh dik lo taka induhsakna avanga inthawhtir chi a ni lo a tite hian Kohhran thianghlim tur zia leh a dinhmun san zia a sawi chiang viau.

 

A thupui Ringtu leh Kohhran tih a ni ang chiah hian ringtute nun tur pawimawh tak tak tarlan a ni a. Uluk taka zir chuan hlawkpui loh tum talh pawhin a hlawk loh theih loh vang. Mi thenkhat tui leh thlarauva an pian hnuin, Kohhran thuneihna kalhmang an hriat tâwk loh vangin an kal sual fo thin tiin a ziak a, ringtute kan fimkhur a tul zia a tarlang chiang hle mai a. Tin, thlarau thianghlim baptisma ka chang kan tih hian ‘Pathian leh a Kohhranin a khap tlatte pawh ka ti duh lo,’ tih a huam tel tiin a ziak bawk a, thlarau kan chan hian ringtute a kaihhruai tur a ni tih, fiah leh chiang taka tarlanna lehkhabu pawimawh takah hei hian a hlang chiang leh zual.

 

Phek 51-na para tawp ber kha uluk takin lo chhiar chhin teh u aw…

 

Tawngkam thain sial a man tih a sawifiahna hi ka vawikhat hriatna a ni a, a mawi asin! Tawngkam tha kan tih hian thlir dan dik, rilru dik a keng tel tih kan hre reng tur a ni a ti thlap nia!

 

A tawp lama tarlan tel hram ka duh chu kan tlin tawk eng nge chu ka hre hauh lo va, a lehkhapuan hi newsprint niin ka hria a, hei aia tha deuh leh han en pawha mi lém deuh hman ni thei se, a mi hìp pawh a na deuh angem aw chu ka ti.

 

Thupui ziaktuin thuhmahruaia a ziah lan ang hian he Beihrual Thupui Bu hi tangkaipui theuh ang u.

 

Kohhran thu awih lo ringtu chu engti kawng mahin ringtu tha a ni thei ngai lo vang tihte hi vung taka sawi chiam tham a awmin in hria em?

 

In lehkhabu phek 56 leh phek 57-na kha a fiah lo ve deuh em? n fiah lo bìk a awm ve em?

 

 

TUMPUI BIAK IN as on 17.12.2024

2024 BEIHRUAL BU THLIRLETNA

BEIHRUAL BU THLIRLETNA

Zorema Hlondo, Kolasib

Kumin Beihrual Thupui Bu chu August ni 8 khan tlangzarh a lo ni ta a, a thupui hian mi a hip nghal hle. THUAWIHNA hi mitin mamawh a ni a, a ziaktu lah kan Kohhranah chuan hrelo nih pawh zahthlak khawpa milar, Lalpa tana mihrât a lo ni nen, zir thuai thuai a chakawm hle.

Mithiam bik ka ni lo nain, sawi chak deuh deuh ka nei a, thal bekang puah ve leh pawp mai teh ang. A hre zawk leh thiam zawkte cho chhuahna ni teh se.

A kawm a nalh a, a puan a tha bawk a, a felfaiin a hnawk nuai lova, hmuh a hahdam khawp mai. Kuminah hian copy 9000 siam a ni a, member nuaikhat pelah hian kan hralh zo thei angem tih hi rilrua riak reng pakhat chu a ni.

Kumin thupui bu hi UPC-NEI Literature & Publication Board-in a tihchhuah a ni a. Lynden Offset Press, Mualpui Salem Veng, Aizawl-ah print a ni. Thupui 20 awmin thupui tin tawpah sawiho tur dah vek a ni a, a thupui leh sawiho turte hi a inhmu tha hlawm hle. Missionary Day-a thupui dah a ni lo hi a va fuh tak! 

Thupui Bu hi pakhat Rs. 50/- man a ni a. A chhungthu, a ziaktu thawhrimna, editing board-te hah zia ngaihtuah chuan a man hi a tlawm a nia....

A ziaktu hi lehkhabu ziak fo tawh a ni tih a lang chiang hle a. Bung hmasa berah a thupui kengtu THUAWIHNA awmzia fiah leh chiang takin a rawn ziak nghal a. Hnamdang tawng nen, a tobul nen chhiar theih leh hmuh theiha a awm hian a ti lehkhabu lehzual mange. A bu hi uluk taka chhiar hian a ziaktu leh Editing Board-te thawhrim tur zia fiah takin a hmuh theih a, an fakawm tak zet a ni.

Rom 13:1 thu tawitea a rawn hrilhfiah dante hi a va tawk tiu teu em! 

Phek 48-na Sl. No. 3-na hi tuman lo chhiar kân suh u. Bung 10-na a rawn khaikhawmna nen hian aw...

DUHKHAWP LOHNA LAM:

Hre ber leh thiam ber niawm tak hian duhkhawp lohnate ka'n nei ve khanglang a, a ziaktu leh Editing Board-te rilru ka tihnat loh hram ka beisei a, an uluk lo tihna ni lovin; an lo uluk leh zual phah hlauh takin... 

Phek number dah na:

A phek number 1 leh 2 an dahnaah hian a number hi dah lang lo se, phek 3-na atang hian lang tan chauh se a nalh zawkin a rinawm.

A phek bal niawm tak a awm :

A phek thenkhat print-na ink kai ni awm tak te, xerox-na hnuhma niawm tak te, lo inrin ve ringawt te a awm a. Heng hian tlemin rilru a tihnual deuh. General huapa lehkhabu tihchhuah atan a ti-iai-awm phak em aw a ti theih (Ka lehkhabu bikah chauh pawh hian a ni maithei e).  Offset-a siam a nih avangin ink hnuhma pawh a ni maithei. Offset ni lovin, printer tha leh changtlung zawk nei ila a print a dak tha zawk angem tih ngaihtuahnaah a lo lut.

Consistency :

Consistency a awm lo leh zeuh thin. Entirnan, thenkhatah kohhran tia dah a nih laiin thenkhatah Kohhran tia dah a ni a (thu bul tanna ni lovah). 'K' hi hawrawptê emaw, hawrawp lian emaw pawh nise a hman dan inang vek ta se a hmuh a nuam lehzualin ka ring e.

Thu ziah zawm leh zawm loh hi a har em em, ka thiam hleih theih loh a ni. Chutih rual chuan, 'rorel' tih leh 'roreltu' tih hi thenah ziah hran a ni a, a thenah ziah zawm a ni a. Hei kher hi chu zawm tur niawm takah chuan ka ngai.

Prefix leh Suffix lam :

A thenah 'te' (suffix) hi zawm a awm laiin, thenkhatah a hma thu nena zawm loh a awm. Thuzawmna (Conjunction) atana hmana a hranga an dah erawh tel lovin.

'A' suffix tur niawm tak, a hranga ziah ka hmu nual bawk.

'In' leh 'Ti' tih prefix tur nia lang a hranga dah a awm nual bawk.

Hetah hian dah tel mai ang. Tawng dang (sap tawng, etc) zawmnaa 'TE' awm thenkhatah hian hyphen (-) hman loh a awm zeuh zeuh a, dah ngei tur ni awm tak a ni.

(A hre ber, a thiam ber ka ni miah lo a nia...)

Phek 40-naah hian tul lo deuhah 'S' dah a awm a, hei hi chu save (Ctrl+s) tumna  lamah shift+s hmeh palh a awm a ni maithei. Tin, bracket zawhah karawl (Space) awm tur ziah zawm a awm zeuh bawk.

Title :

A ziaktu thuhma hi a ziaktuin a duh dan taka a rawn ziah chu a ni ngei ang a, a tawpa a hmingah hian 'Evan' tih dah belh zeuh atan ka lo ît. Editing Board lamin tul an ti lo a ni turah ngai ila emaw, a ziaktu hian dah tul a tih loh vanga dah lo a niah pawh ngai ta ila. Kohhran kutchhuak a nihna zawnah a nihna dah sak hi a fuh zawk angem aw ka ti... 

Header:

Phek tin dinglam chunglamah zel hian rinkual chhungah Thupui dah vek a ni a, ka hmuh danah hei hi vertical (a chung leh hnuai) zawng hian a lai lo hretin ka hmu a, mit a tikham lek lek em aw ka ti. (Ka mit that tawk loh vang pawh a ni thei tho mai).

Duhkhawp lohna lam hi chu awm lo tawp aiah zawn fe hnua ngaihtuah chhuah a ni e.

A THU KA DUH ZUAL BIK PALI (4) LEK:

1. Thuawih bawiha kan insiam theih hi a pawimawh

2. Pathian thu nena inhmeh thute chuah kan awih thiam a ngai.

3. Tuiah leh thlarauva pian tih hi a nih ang anga pawm tur a ni.

4. Pathian leh a Kohhran thute hi a then zawma a then zawm loh mai tur a ni lova, a zavaia zawm tum tur a ni.

Thupui ziaktu hian Thuawihna chung chang hi chi hrang hrangin a rawn ziak chhuak a. A awmzia te, a tehna te, Pathian thu awihna te, nu leh pa thuawihna te, sorkar leh khawtlang hruaitute thuawihna te, Isua thuchah ropui zawm kawnga thuawihna te, a pawimawh leh hlutna te bakah thuawih loh pawi ziate a ziak chiang hle mai a, uluk taka kan zir theuh chuan a ziaktuin thuhmaa a ziah ang hian kan hlawkpui viau ang. Tin, dictionary atana hman theih deuhthaw khawpa a tobul leh tawng dang nen a rawn ziak thin hian a tihlu lehzual asin aw...

Thlalak hi chu General Pennet lam thlalak aw...

TAIHMAKNA

TAIHMAKNA

-          Zorema Hlondo

Bible Ref. : 2 Petera 3:14 “Chuvangin, duh takte u, chutiang thilte chu in beisei avangin  bawlhhlawh kai lo leh sawiselbovin, thlamuang taka in awm a hmuh theih nan che u, taihmak chhuah rawh u.”

 Sawihawnna :

Taima = diligent/hard working/industrious

Origin = Latin (diligere)

Mizo CL Edition = theihtawp chhuah rawh u

A chunga Bible thu leh a \awng bul lam (Bible hi a tirah kan \awnga ziah a ni lova, lehlin a nih avangin) a\anga kan hrilhfiah dawn chuan Taima tih chu mahni hnaa tui tlat, mahni hnaa inpe, theihtawp chhuah tiin kan sawi thei ang.

Bible-a kan hmuh dan :

Bible ah Taima tih hi vawi 11 (Thuthlung hluiah vawi 8, Thuthlung tharah vawi 3) kan hmu a, Taihmak tih thumal hi vawi 8 (Thuthlung hluiah vawi 2, Thuthlung tharah vawi 6) kan hmu a. Taihmak chhuah rawh u/ula/chhuahin tih hi vawi 4 kan hmu bawk a, Taihmak chhuah leh zual rawh u tiin vawi 1 kan hmu bawk. Heivang hian Pathian ringtute tan THATCHHIAT hi thil thianglo a ni ti ila kan sawi sual kher lo maithei.

TAIHMAK PAWIMAWHNA |HENKHATTE :

1. Hotu/hruaitu ni turin Taihmak a pawimawh : 1Lalte 11:28-ah chuan, “Chu Jeroboama chu mi chak huaisen a ni a: tichuan Solomona’n chu tlangvâl chu MI TAIMA TAK nia a hriat avângin Josefa chhûngte hnathawh zawng zawng chunga hotuah a siam a,” tih kan hmu a. Hei hian hruaitu ni turin Thatchhe tam hmun a awm lo tih min kawhhmuh thei a. Hruaitu kan nihna zawnah hian midangte peih bak thleng \hal tur chuan taihmak ve viau a ngai ang. Chu chu kan mawhphurhnain a ken tel a ni lawi si a, chutiang tlinlo tan chuan hruaitu nih chu a theih mai ang a, HRUAITU |HA nih erawh an pass kher lo maithei.

2. Roreltu \ha ni turin : Rom 12:8-ah “Roreltuin taima takin rel rawh se” tih kan hmu a. Roreltute hian kan rorelna hmun leh rorel pawimawh zia kan hriat reng loh chuan kan uluk lo mai ang tih a hlauhawm a. Kan rorelthuchhuak ang ang hi Kohhran kal dan  leh hawi lam a nih \hin avangin REL LAI TAK hi uluk a ngai e mem a ni. Rorelnaa a tawp thlenga \hutah ringawt taima lovin; a REL lai takah pawh hian kan taihmak a ngai hle a. Namnul emaw, a nghawng tur pawh ngaihtuah lem lova ro hi rel theih a nih avangin Kohhran \ha, member \ha, Kohhran fel fai, Kohhran kal dik kan neih reng theihna turin rorel hi uluk in taima reng fo vang u.

3. Ringtu tha tih lanna turin : 1Tim. 4:13-15 ah chuan Paula hian Timothea hnenah hian a taihmakna tur kawng hrang hrang a hrilh a ni mai lova, chungah chuan inhmang zo turin a chah tel hial a. Kan hnathawh leh mawhphurhna, rawngbawlna kawng hrang hrangah hian kan taihmak tawk loh \hin avang hian RINGTU |HA hi ka ni phak lo fo \hinin a lang a. Ringtu \ha chu a TAIMA tur a ni tih hi vawng reng ila, vawn mai duhtawk lovin; nunpuiin hlen chhuak bawk ila engvangin nge kan kan chauh theih ang ni?Kan taihmak tawk \hin loh vang hian kan chau a. Ringtu taima tak ni ila, “Tunlai chu ka rau lo lutuk a” “Pathian thu pawh ka rilruah lang awm lo reng reng” “Ka hun a ni tih ka hre reng naa, thusawi tur pawh ka hre lo” kan tih fo hi a reh ngeiin a rinawm.

He thu; 1Tim. 4:13-15 “Ka lo kal hma loh zawng chhiar te, thu hrilh te, zirtir te bei uar rawh. Nangmaha awm thilpek, hrilh lawk anga upahote kut nghata Pathianin a neihtir che kha thlahthlam suh. Mi zawng zawng hnena i sawtna a lan theih nan chung thilahte chuan taima la, chungah chuan inhmang zo rawh,“ tih hi Timothea tan chauh ni lovin, kan tan pawh a ni tih hi pawm tlat ang u.

4. Chhandam ni turin : Hebrai 6:11-ah “Nimahsela, tawp thlenga beiseina famkim hmu turin in taihmak pangngai ang khan taihmak chhuah \heuh fo ula kan ti em em mai” tih kan hmuh avangin Mi taima tan pawha har em em; beiseina famkim hmuh a, chhandam nih hi mi thatchhe tan phei chuan a har leh zual dawn niin a lang a. Ringtu kan nih chhan chu CHHANDAMNA kan beisei vang ni a. Chu kan beiseina a famkim theihna tur chuan kan thatchhiat a thiang lova,  mi taimate tana buatsaih a nih avangin kan BEISEINAa famkim theihna turin taihmak chhuah zel ang u.

5. Tlu lo tur chuan TAIHMAK a ngai : 1Petera 1:10-ah chuan, “Chuvangin, unaute u, a kohna leh a thlanna che u chu tinghet turin taihmak chhuah lehzual rawh u; chung chu in tih zawngin engtikah mah in tlu lo vang,” tih kan hmu a. Rinna nghet nei a, hnungtawlhna leh chauhna tur emaw, tlukna tur nia langah tlu lo leh chau lova kan awm reng theihna turin min kohna leh min thlanna tinghet tur hian taihmak chhuah leh zual ang u.

Khaikhawmna :

Rinna kawng chauh pawh ni lovin, mihring nun hrim hrimah hian mi taima leh mi thatchhe kar hlat zia a takin kan hmu fo ang a, kan hre hlei hlui ang. Mi thatchhe tan harsa tak anga lang kha mi taima tan chuan awlsam tê a lo ni thei a. Mi thatchhe tan engmah ni lo kha mi taima tan dinchuahpui tham a ni daih thei bawk.

Kan Pathian thu pawh hian thatchhe tur hian min zirtir ngai miah lova. Genesis Bu a\ang tawhin rim taka thawk tura tih kan ni hrim hrim a.Bang lova \awng\ai te, lawm fo te, thih thlenga rinawm te pawh hi a har em em dawn a, thatchhiat leh lek phei chuan a har leh zual ngei ang. Kan chhandamna hlawh chhuak tur leh rinna nung nei reng tur hian taihmak chhuah leh zual ang u.

RUALBANLO SUNDAY PUAL

RUALBANLO SUNDAY PUAL

Zorema Hlondo

Dt. 02.07.2023

Luka 14 :13&14 :

“Ruai i \heh hun chuan pachhiate, piangsualte, kebaite, mitdelte sawm zawk ang che; tichuan chung ang chuan rulhna tur che an neih loh avangin i eng a thawl ang; mi felte thawhleh hunah rulh leh i ni dawn si a,” a ti a.

 

Rualbanlo te leh UPC :

Kum 2012 General Conference rorel no. 4-na chuan ‘Rualbanlo Sunday hi hman ve tawh ni se’ tia a rel bawhzui in Executive Board Committee dt. 11-18 April 2012 rorel no. 27-na  chuan, “Kum tin July Pathianni hmasa ber apiang hi ‘Rualbanlo Sunday’ atan hman ni se, Rualban lo Sunday zan inkhawmah hian rualbanlote pualin thawhlawm lak khawm ni se, chu chu District kal tlangin General Headquarters ah thehluh thin ni se,” tiin a pass a, hei hi kan bul \anna niin kum 2012  July Pathianni hmasa ber (July 1) khan Disable Sunday hi a vawi khatna atan kan lo hmang \an ta a. Thawhlawm pawh hi 2020 a\ang khan General-ah lut lovin Distirct-ah a lut tawh a, 2023 Dist. Conf. report-a a lan danin nikum khan Bial hrang hrangin Rs. 97,935/- kan chhung lut a ni. Hemi a\ang hian kan Bial chhunga mi 13 hnenah thilpek pek a ni nghe nghe.

Rualbanlo te Ni leh midang te :

Baptist hian November Pathianni hnuhnung berah Rualbanlote Ni hi an hmang \hin a, Presbyterian hian kuminah hian June ni 18 khan an hmang. Pianphunga rualbanlo han tih hian pian tirh atanga rualbanlo sa te, accident avanga rualban zo ta lote pawh an awm a, rualbanlo te hi khawvel sorkar hrang hrangte hian an ngai pawimawh em em a, an pualin khawvel ram hrang hrangte hman turin December ni 3 hi Rualbanlote Ni, ‘World Disability Day’ ah an lo puang ta hial a ni.

Rualbanlo chu enge??

Mizoten Rualbanlo kan tih hi Sap\awngin Disabled people/person an ti a. Tunlai chuan ‘Disabled’ Thil ti theilo pawh ti phal tawh lovin ‘Differently Abled people/person’ an ti tawh nghe nghe. ‘Disabled’ han tih khan thil engmah ti thei lo ah kan chhuahin a lang a, thiam taka ‘Differently Abled’ an lo ti ta hi a fuh khawp mai. Mizo\awng chuan dah dawn ta i la, ‘Thil engmah ti thei lo ni bik lovin mi pangai tih dan ang lo deuha an tih theih dan danglam deuh hlek’ tihna a ni thei ang.

Rualbanlo an tam :

Mi thiamte chhût dân chuan Khawvêl mihring za zêla panga (5%) hi Rualbanlo an ni a, rualbanlohna hi rilru lam chauh te, taksa leh pianphung chauhva rualbanlohna te, a pahniha rilru lam leh pianphunga rualbanlohnate a awm thei a ni. Rualbanlohna chhan hrang hrang a awm a, nuin nau a pai lai atanga fel lo awm thei atang te, piantirh lai thil awm dân leh naupan laia natna vei atang te, ei \ha tlâkchhamna avang te, leh Mizovin, ‘Piansualin tlai luat a nei lo’, an lo tih angin, accident chi hrang hrang avângin rualbanlohna a awm thei a ni.

Rualbanlo leh Mizo te :

Mizote hian rualbanlote kan hmuh dân leh kan ngaihdan hi a \ha vak lo \hin a, kan hmusit deuh a, kan biak duh dan pawh a nawmnah fo \hin a, mi pangngaia chhuah theih pawh kan bawl \hin avanga pangngailo tulh tulh kan nei nual a ni. Hnam changkâng apiangin rualbanlote enkawl an thiam a, rualbanlote hi rilru lama banlo an nih chuan finna zirtîr theih an ni a, mi pangngai angin an zir chaklo a nih pawhin anmahni rau rauvah hma an sâwn thei a, an thiamna zir theih ang ang kha anmahni inenkawl nân leh thil tangkai thawhchhuah ve nân an hmang thei a ni. Tunah erawh chuan heti lam kawngah kan lo harh chhuak ta a, bawl ai chuan khawngaihna nena anmahni chhawmdawl duhna thinlung kan lo nei ta hle a, a Kristianin a Mizo khawp mai. Khawvel pum huap chu sawi loh Mizo zingah pawh rualbanlo lehkha thiam sâng tak tak, mitdel chunga MA passed te, infiamna lama thei tak tak te pawh sawi tur an awm nual mai, kan sawi vek seng lo ang.

            Hengte hian pianphunga rualbanlote hi mipui leh an chhung ten kan en dan a zirin mi pangngai angin, engkim ti ve theiin an nunkhua an hmang thei tih a tichiang hle a. |anpui a hneka, an inkiltawih zual theihna tur leh eng mah ti ve thei lo tura an rilru an tihhniam theihna tur kan zawng zawk niawm taka kan be-chhawhchhi vel \hin hi kan sim a ngai a. An puitlin theihna tur leh midang tih theih ang an ti ve thei tihna thinlung an put theihna atana puih hi kan tihtur a ni.

 Rualbanlo te leh Sorkar :

Mizoram Sorkar, DP & AR chuan thuchhuah siamin Sorkar hna 4% hi Rualbanlo te tan dah (Reserve) tura tih a ni. Report-a a lan danin 2019 thleng khan Rualbanlo mi 60 chuang zet te chu Mizoram Sorkar hnuaiah hna pek an ni tawh a. Rural Development ah pawh AEY 3% hi Rualbanlo te tana dah a ni.

          Tin, Election of India pawhin thuchhuah siamin Polling Station ah reng reng wheelchair a nawt luh theih tur ani an tih bakah EVM ah pawh Mitdel hawrawp te an dah hial ani.

 

DIRECTORATE OF SOCIAL WELFARE & TRIBAL AFFAIRS, AIZAWL, MIZORAM HNUAIA RUALBANLO TANA HAMTHATNA DIL THEIH TE :

1.     Indira Gandhi National Disability Pension Scheme (IGNDPS)- He scheme hi National Social Assistance Programme (NSAP) hnuaia awm niin, rualbanlo BPL category hnuaia awm tena thla tin ₹400 pension an dawn ve theihna a ni.

2.     Disability Pension - He scheme hi state sawrkar funding a ni a, rualbanlote tana thla tin ₹350 pension an lak theihna a ni.

3.     National Handicapped Castes Finance & Development Corporation (NHFDC) Loan Scheme- He scheme hnuaiah hian rualbanlo te tan awlsam zawkin eizawnna bul \anna/zirna senso atan te loan lak theih a ni.

4.     Economic Rehabilitation - He programme hnuaiah hian trade thlan tur hrang hrang awmin ran vulh (vawk & ar) tanpuina ₹4000/- pek a ni a, petty business a thlan theih bawk. Puanthui khawl leh shoe-making thlang te tan a bungruaa pek chhuah a ni thung.

5.     Writer/Scribe Allowance - Rualbanlo zirlaite tan an zirlai exam ziahsaktu rawihna senso bill theih a ni.

6. Handicapped Students Stipend- Mizoram chhunga rualbanlo school (govt./private/special school) la kal mek ten hetiang hian stipend an dawng thei a ni :

Upto Class IV - ₹800/- per head per year

Class V-VII - ₹1000/- per head per year

Class VIII-XII - ₹2500/- per head per year

7.     Unemployment Allowance - Rualbanlo Employment Exchange Office-a in register hna la hmulo te hnenah ₹7800 pek thin a ni.

8.     Training Centre for Specially-Abled Persons - He Training Centre hi Chaltlang & Lunglei-ah awmin rualbanloten eizawnna ngelnghet an neih theih nana din a ni a, hemi hnuaiah hian a thlawn vekin puanthui leh pheikhawk chhe siam a zir theih a. An zir chhungin trainee stipend atan ₹8400 theuh dawng telin course an zawh hnuah bul an tanna tur atana an mamawh hmanrua te pek tel an ni. Hostel mamawh tan a thlawnin a awm theih bawk.

9.     Job Reservation - RPWD Act, 2016 hnuaiah rualbanlo ten sawrkar hna awlsam zawka an luh theih nan 4% quota zuah sak an ni.

10.  Age Relaxation - Rualbanlo Scheduled Tribe (ST) chin te chu state sawrkar hnuaia an thawh awm tawk hna thawk thei turin kum 35+15 ngainat thiamna a awm a ni.

Rualbanlo te leh Bible :

Luka 4 : 18 - 19 : Riangvaite hnenah Chanchin tha hril tura mi ruat avangin Lalpa Thlarau chu ka chungah a awm; a ni chuan salte hnena chhuahna thu leh, mitdelte hnena mitvar neih lehna thu sawi tur te, tihduhdah tuarte chhuahtirna tur te, Lalpa lungawi kum thu sawi tur tein, mi tir a ni.

Marka 8 : 22-25 : Tin, Bethsaida khua chu an lo thleng a. Tin, a hnenah mitdel an rawn hruai a, amah dek turin an ngen a. Tin, ani chuan mitdel kut chu a chelh a, khua ata a kai chhuak a; tin, a mitah chil a chhak a, a chunga a kut a nghah zawhin, “Khua i hmu thei em?” tiin a zawt a. Tin, a han dak chhuak a, “Mihring ka hmu a, thing kal ang maiin ka hmu si,”  ti a. Tin, a mitah chuan a kut a nghat leh a; tin, ani chuan a en reng a, a lo dam ta mai a, engkim fiah takin a hmu thei ta a.

Marka 10 : 51 - 52 : Tin, Isuan amah chu a lo bia a, “I chungah engtia ka tih nge i duh?,” a ti a. Tin, mitdel chuan a hnenah, “Rabboni, hmuh theih ka duh,” a ti a. Tin, Isuan a hnenah, “Kal tawh rawh, i rinna hi i dampui a ni e,” a ti a. Tichuan a hmu thei ta nghal a, kalkawngah chuan Isua a zui ta a.

Johana 5 : 2 - 9 : Tin, Jerusalem-ah chuan beram kawngkhar kiangah dil a awm a, chu chu Hebrai tawngin Bethesda an ti a, hulhliap panga a nei nghe nghe a. Chungah chuan damlo te, mitdel te, kebai te, zengte tam tak an mu hlawm a. Tin, chutah chuan kum sawmthum leh kum riat na mi tu emaw a awm a. Tin, Isuan a mu chu a hmu a, chutiangin rei tak a awm tawh tih a hria a, a hnenah, “Tihdam i duh em?” a ti a. Tin, mi damlo chuan, “Ka pu, tui a fawnin dila mi dahtu ka nei lo va, ka kal chhungin mi dangin mi pen thlak khalh thin,” a ti a, a chhang a. Tin, Isuan a hnenah, “Tho la, i awngphah la la, kein kal tawh rawh,” a ti a. Tin, thawklehkhatan chu mi chu a dam ta nghal a,a awngphah chu a la a,a kal ta a.

Johana 9 : 1 - 7 : Tin, Isuan a kal pahin a pian tirh ata mitdel pakhat a hmu a. Tin, a zirtirten a hnenah, “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zawt a. Isuan, “He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi. Chhun a nih laiin mi tirtu hna kan thawk tur a ni; zan a nih dawn tak hi, chu mi hunah chuan tuman hna an thawk thei lo vang. Khawvela ka awm chhungin khawvel entu ka ni,” a ti a, a chhang a. Chutianga a sawi zawh chuan leiah chil a chhak a, chil chuanin hlum a siam a, tin hlum chu a mitah a hnawih a, tin, a hnenah, “Siloam dilah va sil rawh,” a ti a. (Siloam chu “Tirh” tihna a ni.) Tin, a va kal a, a sil a, mitvarin a lo haw leh ta a.

Leviticus 19 : 14 - 15 : Bengngawng chu anchhia i lawh tur a ni lo va, mitdel hmaah tlukna i dah tur a ni hek lo va, i Pathian chu i tih tur asin: Kei hi LALPA chu ka ni. Rorêlnaah chuan fel lo takin in rel tur a ni lo; mi rethei i thlei tur a ni lo va, mi thiltithei i zah chuang tur a ni .

Exo 4:11 : Tin, Lalpa chuan  a hnenah, “Mihirng ka hi tu siam nge ni a, \awngtheilo te, bengngawng te, mivar te, mitdel te pawh hi tu tih nge ni? Kei Lalpa hi ka nilovem ni?” tih khan hmu a. Pathian siam tho niin  aropuina tura a siam te pawh an ni.

A PAWI LO (IT IS WELL)

A PAWI LO (IT IS WELL)

07.02.2013

It Is Well With My Soul

When peace like a river, attendeth my way,

When sorrows like sea billows roll;

Whatever my lot, Thou hast taught me to say,

It is well, it is well, with my soul.

Refrain:

It is well, (it is well),

With my soul, (with my soul)

It is well, it is well, with my soul.

Though Satan should buffet, though trials should come,

Let this blest assurance control,

That Christ has regarded my helpless estate,

And hath shed His own blood for my soul.

My sin, oh, the bliss of this glorious thought!

My sin, not in part but the whole,

Is nailed to the cross, and I bear it no more,

Praise the Lord, praise the Lord, O my soul!

For me, be it Christ, be it Christ hence to live:

If Jordan above me shall roll,

No pang shall be mine, for in death as in life,

Thou wilt whisper Thy peace to my soul.

But Lord, 'tis for Thee, for Thy coming we wait,

The sky, not the grave, is our goal;

Oh, trump of the angel! Oh, voice of the Lord!

Blessed hope, blessed rest of my soul.

And Lord, haste the day when my faith shall be sight,

The clouds be rolled back as a scroll;

The trump shall resound, and the Lord shall descend,

Even so, it is well with my soul.

He hla hi mawi ka tih mai piahah a thu hi a tha ka ti a, a phena thu inthup hi ka hai chhuah phah ta nge nge a. Midang tan thawkna vak lo mahse ka nunah thu a sawi tlat. He hla phuah a nih chhan leh a phuahtu hringnun ka ngaihtuah hian "Heti khawp hian a ni maw mite hian Pathianah an rinna an lo nghah le," tih hi ka ngaihtuah a ni. A phena thu awm ka ziah chhuah hi a famkim lo hle a, tul leh pawimawh ka tih chin chauh ka dah chhuak a, chhiartu zawng zawngten Pathian ropuina in hmuh ngei ka duh e.

He hla phuahtu Haratio Spaffords hi Oct. ni 20, 1828 khan Chicago-ah a lo piang a, a thian chu lar zualte chu DL Moody leh hla phuahtu lar tak Ira D Sankey te niin a  nupui hi Anna Larsen a ni a, Norway mi a ni thung. Dan hremi hlawhtling tak niin an thiante rawngbawlnaah an nupa hian nasa takin an pui bawk thin. An vanduai angreng hle a, an fapa neih chhun chu kum 4 mi niin 1870 khan Pneumionia vangin an chan a. A eizawnna huang zauh mahse kum 1871 khan a thawhna Chicago chu a kang vak a, a hmingah the Great Chicago Fire tiin an vuah nghe nghe. Hetah hian mi 250 an thi a, mi 90,000 chuang In leh lo nei lovin an awm bawk a. Spaffords a pawh a bang bik lo. Hetih lai pawh hian an chhungkua  hian heng in leh lo neilo thenkhatte chu enkawlin, inhliam leh na neite an tanpui a, ei leh in ngaihtuah sakin Krista hmangaihna chu a takah an chantir thei a.

A nupui hriselna a that vak loh avangin kum 1873-ah Europe lamah chawlh hmangin an chhungkuain an zin a. An zinna ber hi Britain velah a ni. Chawlh hman mai piah lamah a thian hnai tak, DL Moodya’n England-ah rawng a bawl dawn tih a hriat avangin a rawngbawlna tawiawm a duh vang a ni pakhat a. Hetah hian hun engemaw chen an cham a. A sumdawnna lama tihfel tur a awm avangin a nupui leh fate 4, Anna Annie (kum 11), Margaret Lee (kum 9), Elizabeth Bessie (kum 5) leh Tanetta (kum 2) mite chu Lawngin a thawn haw a. Lawnga an chuan lai, Nov ni 22, 1873 ah chuan an chuanna lawng, Ville Du Havre chuan tawhsual a tawk a, minute 12 chhung lekin a pil ta mai a. Hetah hian Passengers 307 zinga 226 in nunna an chan a. Heng zingah hian Spafford-a fate 4 pawh telin a nupui erawh a dam chhuak ta hlauh a ni. He thu hi Telegram dawngin an chhiat tawhna hmunah hian a nupui thlamuan turin a kal ta nghal a, an chhiat tawhna hmun a thlen chuan a nupui lungngai taka lo awm chu hnem pahin he hla ropui tak hi a phuah ta a, 

"Khawvel hrut chhuak ila Lal Isua ang hi,

Thianghlim leh fel ka hmu lovang.

A nunna min pek avangin ka fak ang

Hrehawm tuarin rethei mah ila” 

tiin a  au chhuak thei a ni. Hemi rual hian a nupui tawngkam hi a mawi em mai a, kan tarlang ve reng reng teh ang. "Pathianin fanu 4 min pe a, min lak sak leh ta a. Engtik niah emaw chuan engvang nge tih hi ka la hrethiam ngei ang," tiin a tawng chhuak.

Kum 1878-ah fanu Bertha an nei leh a, hei pawh hi kum 4 mi chauh a nih laiin a boral leh ta mai a. 1880-ah fanu, Grace-i an nei leh a.  Kum 1881 Sept. thlaah chuan  America chhuahsanin Israel-ah an pem ta nghe nghe. Hetah pawh hian mirethei tanpui thintu Pawl pakhat,  American Colony an tihah chuan an la inhmang zui zel a. Kum 1888 Oct. ni 20 khan Malaria vangin a boral a. Mt. Zion Cemetery, Jerusalem-ah an phum a ni.

Hetianga vanduaina leh harsatnain a bawm reng emaw tih mai tura an nun an hman lai pawh hian Pathian lakah an vui ngai lo reng reng hi a ropuiin an entawn tlak khawp mai. Mihring rilru chhuakin Pathian a awm talo mai em ni ang? tih tur dinhmunahte pawh an ding tih a lang reng mai a, duh nisela kir lehna rem chang a tam lutuk ang tih a rin theih a. Nimahsela, Pathian laka vui chu sawi loh an la fak zawk thei hi a ropui lai tak a ni. Hetiang nun nei thei tur chuan Pathian a innghat tak tak nih a ngai ngei ang a, Pathian remruat lawm taka pawmtu nih pawh a ngai ngei ang. An nun leh khawsakna khawvel ni mahse Khawvelah an rilru an nghah loh pawh a ngai ang tih a chiang reng mai.