2024 BEIHRUAL BU THLIRLETNA

BEIHRUAL BU THLIRLETNA

Zorema Hlondo, Kolasib

Kumin Beihrual Thupui Bu chu August ni 8 khan tlangzarh a lo ni ta a, a thupui hian mi a hip nghal hle. THUAWIHNA hi mitin mamawh a ni a, a ziaktu lah kan Kohhranah chuan hrelo nih pawh zahthlak khawpa milar, Lalpa tana mihrât a lo ni nen, zir thuai thuai a chakawm hle.

Mithiam bik ka ni lo nain, sawi chak deuh deuh ka nei a, thal bekang puah ve leh pawp mai teh ang. A hre zawk leh thiam zawkte cho chhuahna ni teh se.

A kawm a nalh a, a puan a tha bawk a, a felfaiin a hnawk nuai lova, hmuh a hahdam khawp mai. Kuminah hian copy 9000 siam a ni a, member nuaikhat pelah hian kan hralh zo thei angem tih hi rilrua riak reng pakhat chu a ni.

Kumin thupui bu hi UPC-NEI Literature & Publication Board-in a tihchhuah a ni a. Lynden Offset Press, Mualpui Salem Veng, Aizawl-ah print a ni. Thupui 20 awmin thupui tin tawpah sawiho tur dah vek a ni a, a thupui leh sawiho turte hi a inhmu tha hlawm hle. Missionary Day-a thupui dah a ni lo hi a va fuh tak! 

Thupui Bu hi pakhat Rs. 50/- man a ni a. A chhungthu, a ziaktu thawhrimna, editing board-te hah zia ngaihtuah chuan a man hi a tlawm a nia....

A ziaktu hi lehkhabu ziak fo tawh a ni tih a lang chiang hle a. Bung hmasa berah a thupui kengtu THUAWIHNA awmzia fiah leh chiang takin a rawn ziak nghal a. Hnamdang tawng nen, a tobul nen chhiar theih leh hmuh theiha a awm hian a ti lehkhabu lehzual mange. A bu hi uluk taka chhiar hian a ziaktu leh Editing Board-te thawhrim tur zia fiah takin a hmuh theih a, an fakawm tak zet a ni.

Rom 13:1 thu tawitea a rawn hrilhfiah dante hi a va tawk tiu teu em! 

Phek 48-na Sl. No. 3-na hi tuman lo chhiar kân suh u. Bung 10-na a rawn khaikhawmna nen hian aw...

DUHKHAWP LOHNA LAM:

Hre ber leh thiam ber niawm tak hian duhkhawp lohnate ka'n nei ve khanglang a, a ziaktu leh Editing Board-te rilru ka tihnat loh hram ka beisei a, an uluk lo tihna ni lovin; an lo uluk leh zual phah hlauh takin... 

Phek number dah na:

A phek number 1 leh 2 an dahnaah hian a number hi dah lang lo se, phek 3-na atang hian lang tan chauh se a nalh zawkin a rinawm.

A phek bal niawm tak a awm :

A phek thenkhat print-na ink kai ni awm tak te, xerox-na hnuhma niawm tak te, lo inrin ve ringawt te a awm a. Heng hian tlemin rilru a tihnual deuh. General huapa lehkhabu tihchhuah atan a ti-iai-awm phak em aw a ti theih (Ka lehkhabu bikah chauh pawh hian a ni maithei e).  Offset-a siam a nih avangin ink hnuhma pawh a ni maithei. Offset ni lovin, printer tha leh changtlung zawk nei ila a print a dak tha zawk angem tih ngaihtuahnaah a lo lut.

Consistency :

Consistency a awm lo leh zeuh thin. Entirnan, thenkhatah kohhran tia dah a nih laiin thenkhatah Kohhran tia dah a ni a (thu bul tanna ni lovah). 'K' hi hawrawptê emaw, hawrawp lian emaw pawh nise a hman dan inang vek ta se a hmuh a nuam lehzualin ka ring e.

Thu ziah zawm leh zawm loh hi a har em em, ka thiam hleih theih loh a ni. Chutih rual chuan, 'rorel' tih leh 'roreltu' tih hi thenah ziah hran a ni a, a thenah ziah zawm a ni a. Hei kher hi chu zawm tur niawm takah chuan ka ngai.

Prefix leh Suffix lam :

A thenah 'te' (suffix) hi zawm a awm laiin, thenkhatah a hma thu nena zawm loh a awm. Thuzawmna (Conjunction) atana hmana a hranga an dah erawh tel lovin.

'A' suffix tur niawm tak, a hranga ziah ka hmu nual bawk.

'In' leh 'Ti' tih prefix tur nia lang a hranga dah a awm nual bawk.

Hetah hian dah tel mai ang. Tawng dang (sap tawng, etc) zawmnaa 'TE' awm thenkhatah hian hyphen (-) hman loh a awm zeuh zeuh a, dah ngei tur ni awm tak a ni.

(A hre ber, a thiam ber ka ni miah lo a nia...)

Phek 40-naah hian tul lo deuhah 'S' dah a awm a, hei hi chu save (Ctrl+s) tumna  lamah shift+s hmeh palh a awm a ni maithei. Tin, bracket zawhah karawl (Space) awm tur ziah zawm a awm zeuh bawk.

Title :

A ziaktu thuhma hi a ziaktuin a duh dan taka a rawn ziah chu a ni ngei ang a, a tawpa a hmingah hian 'Evan' tih dah belh zeuh atan ka lo ît. Editing Board lamin tul an ti lo a ni turah ngai ila emaw, a ziaktu hian dah tul a tih loh vanga dah lo a niah pawh ngai ta ila. Kohhran kutchhuak a nihna zawnah a nihna dah sak hi a fuh zawk angem aw ka ti... 

Header:

Phek tin dinglam chunglamah zel hian rinkual chhungah Thupui dah vek a ni a, ka hmuh danah hei hi vertical (a chung leh hnuai) zawng hian a lai lo hretin ka hmu a, mit a tikham lek lek em aw ka ti. (Ka mit that tawk loh vang pawh a ni thei tho mai).

Duhkhawp lohna lam hi chu awm lo tawp aiah zawn fe hnua ngaihtuah chhuah a ni e.

A THU KA DUH ZUAL BIK PALI (4) LEK:

1. Thuawih bawiha kan insiam theih hi a pawimawh

2. Pathian thu nena inhmeh thute chuah kan awih thiam a ngai.

3. Tuiah leh thlarauva pian tih hi a nih ang anga pawm tur a ni.

4. Pathian leh a Kohhran thute hi a then zawma a then zawm loh mai tur a ni lova, a zavaia zawm tum tur a ni.

Thupui ziaktu hian Thuawihna chung chang hi chi hrang hrangin a rawn ziak chhuak a. A awmzia te, a tehna te, Pathian thu awihna te, nu leh pa thuawihna te, sorkar leh khawtlang hruaitute thuawihna te, Isua thuchah ropui zawm kawnga thuawihna te, a pawimawh leh hlutna te bakah thuawih loh pawi ziate a ziak chiang hle mai a, uluk taka kan zir theuh chuan a ziaktuin thuhmaa a ziah ang hian kan hlawkpui viau ang. Tin, dictionary atana hman theih deuhthaw khawpa a tobul leh tawng dang nen a rawn ziak thin hian a tihlu lehzual asin aw...

Thlalak hi chu General Pennet lam thlalak aw...

TAIHMAKNA

TAIHMAKNA

-          Zorema Hlondo

Bible Ref. : 2 Petera 3:14 “Chuvangin, duh takte u, chutiang thilte chu in beisei avangin  bawlhhlawh kai lo leh sawiselbovin, thlamuang taka in awm a hmuh theih nan che u, taihmak chhuah rawh u.”

 Sawihawnna :

Taima = diligent/hard working/industrious

Origin = Latin (diligere)

Mizo CL Edition = theihtawp chhuah rawh u

A chunga Bible thu leh a \awng bul lam (Bible hi a tirah kan \awnga ziah a ni lova, lehlin a nih avangin) a\anga kan hrilhfiah dawn chuan Taima tih chu mahni hnaa tui tlat, mahni hnaa inpe, theihtawp chhuah tiin kan sawi thei ang.

Bible-a kan hmuh dan :

Bible ah Taima tih hi vawi 11 (Thuthlung hluiah vawi 8, Thuthlung tharah vawi 3) kan hmu a, Taihmak tih thumal hi vawi 8 (Thuthlung hluiah vawi 2, Thuthlung tharah vawi 6) kan hmu a. Taihmak chhuah rawh u/ula/chhuahin tih hi vawi 4 kan hmu bawk a, Taihmak chhuah leh zual rawh u tiin vawi 1 kan hmu bawk. Heivang hian Pathian ringtute tan THATCHHIAT hi thil thianglo a ni ti ila kan sawi sual kher lo maithei.

TAIHMAK PAWIMAWHNA |HENKHATTE :

1. Hotu/hruaitu ni turin Taihmak a pawimawh : 1Lalte 11:28-ah chuan, “Chu Jeroboama chu mi chak huaisen a ni a: tichuan Solomona’n chu tlangvâl chu MI TAIMA TAK nia a hriat avângin Josefa chhûngte hnathawh zawng zawng chunga hotuah a siam a,” tih kan hmu a. Hei hian hruaitu ni turin Thatchhe tam hmun a awm lo tih min kawhhmuh thei a. Hruaitu kan nihna zawnah hian midangte peih bak thleng \hal tur chuan taihmak ve viau a ngai ang. Chu chu kan mawhphurhnain a ken tel a ni lawi si a, chutiang tlinlo tan chuan hruaitu nih chu a theih mai ang a, HRUAITU |HA nih erawh an pass kher lo maithei.

2. Roreltu \ha ni turin : Rom 12:8-ah “Roreltuin taima takin rel rawh se” tih kan hmu a. Roreltute hian kan rorelna hmun leh rorel pawimawh zia kan hriat reng loh chuan kan uluk lo mai ang tih a hlauhawm a. Kan rorelthuchhuak ang ang hi Kohhran kal dan  leh hawi lam a nih \hin avangin REL LAI TAK hi uluk a ngai e mem a ni. Rorelnaa a tawp thlenga \hutah ringawt taima lovin; a REL lai takah pawh hian kan taihmak a ngai hle a. Namnul emaw, a nghawng tur pawh ngaihtuah lem lova ro hi rel theih a nih avangin Kohhran \ha, member \ha, Kohhran fel fai, Kohhran kal dik kan neih reng theihna turin rorel hi uluk in taima reng fo vang u.

3. Ringtu tha tih lanna turin : 1Tim. 4:13-15 ah chuan Paula hian Timothea hnenah hian a taihmakna tur kawng hrang hrang a hrilh a ni mai lova, chungah chuan inhmang zo turin a chah tel hial a. Kan hnathawh leh mawhphurhna, rawngbawlna kawng hrang hrangah hian kan taihmak tawk loh \hin avang hian RINGTU |HA hi ka ni phak lo fo \hinin a lang a. Ringtu \ha chu a TAIMA tur a ni tih hi vawng reng ila, vawn mai duhtawk lovin; nunpuiin hlen chhuak bawk ila engvangin nge kan kan chauh theih ang ni?Kan taihmak tawk \hin loh vang hian kan chau a. Ringtu taima tak ni ila, “Tunlai chu ka rau lo lutuk a” “Pathian thu pawh ka rilruah lang awm lo reng reng” “Ka hun a ni tih ka hre reng naa, thusawi tur pawh ka hre lo” kan tih fo hi a reh ngeiin a rinawm.

He thu; 1Tim. 4:13-15 “Ka lo kal hma loh zawng chhiar te, thu hrilh te, zirtir te bei uar rawh. Nangmaha awm thilpek, hrilh lawk anga upahote kut nghata Pathianin a neihtir che kha thlahthlam suh. Mi zawng zawng hnena i sawtna a lan theih nan chung thilahte chuan taima la, chungah chuan inhmang zo rawh,“ tih hi Timothea tan chauh ni lovin, kan tan pawh a ni tih hi pawm tlat ang u.

4. Chhandam ni turin : Hebrai 6:11-ah “Nimahsela, tawp thlenga beiseina famkim hmu turin in taihmak pangngai ang khan taihmak chhuah \heuh fo ula kan ti em em mai” tih kan hmuh avangin Mi taima tan pawha har em em; beiseina famkim hmuh a, chhandam nih hi mi thatchhe tan phei chuan a har leh zual dawn niin a lang a. Ringtu kan nih chhan chu CHHANDAMNA kan beisei vang ni a. Chu kan beiseina a famkim theihna tur chuan kan thatchhiat a thiang lova,  mi taimate tana buatsaih a nih avangin kan BEISEINAa famkim theihna turin taihmak chhuah zel ang u.

5. Tlu lo tur chuan TAIHMAK a ngai : 1Petera 1:10-ah chuan, “Chuvangin, unaute u, a kohna leh a thlanna che u chu tinghet turin taihmak chhuah lehzual rawh u; chung chu in tih zawngin engtikah mah in tlu lo vang,” tih kan hmu a. Rinna nghet nei a, hnungtawlhna leh chauhna tur emaw, tlukna tur nia langah tlu lo leh chau lova kan awm reng theihna turin min kohna leh min thlanna tinghet tur hian taihmak chhuah leh zual ang u.

Khaikhawmna :

Rinna kawng chauh pawh ni lovin, mihring nun hrim hrimah hian mi taima leh mi thatchhe kar hlat zia a takin kan hmu fo ang a, kan hre hlei hlui ang. Mi thatchhe tan harsa tak anga lang kha mi taima tan chuan awlsam tê a lo ni thei a. Mi thatchhe tan engmah ni lo kha mi taima tan dinchuahpui tham a ni daih thei bawk.

Kan Pathian thu pawh hian thatchhe tur hian min zirtir ngai miah lova. Genesis Bu a\ang tawhin rim taka thawk tura tih kan ni hrim hrim a.Bang lova \awng\ai te, lawm fo te, thih thlenga rinawm te pawh hi a har em em dawn a, thatchhiat leh lek phei chuan a har leh zual ngei ang. Kan chhandamna hlawh chhuak tur leh rinna nung nei reng tur hian taihmak chhuah leh zual ang u.

RUALBANLO SUNDAY PUAL

RUALBANLO SUNDAY PUAL

Zorema Hlondo

Dt. 02.07.2023

Luka 14 :13&14 :

“Ruai i \heh hun chuan pachhiate, piangsualte, kebaite, mitdelte sawm zawk ang che; tichuan chung ang chuan rulhna tur che an neih loh avangin i eng a thawl ang; mi felte thawhleh hunah rulh leh i ni dawn si a,” a ti a.

 

Rualbanlo te leh UPC :

Kum 2012 General Conference rorel no. 4-na chuan ‘Rualbanlo Sunday hi hman ve tawh ni se’ tia a rel bawhzui in Executive Board Committee dt. 11-18 April 2012 rorel no. 27-na  chuan, “Kum tin July Pathianni hmasa ber apiang hi ‘Rualbanlo Sunday’ atan hman ni se, Rualban lo Sunday zan inkhawmah hian rualbanlote pualin thawhlawm lak khawm ni se, chu chu District kal tlangin General Headquarters ah thehluh thin ni se,” tiin a pass a, hei hi kan bul \anna niin kum 2012  July Pathianni hmasa ber (July 1) khan Disable Sunday hi a vawi khatna atan kan lo hmang \an ta a. Thawhlawm pawh hi 2020 a\ang khan General-ah lut lovin Distirct-ah a lut tawh a, 2023 Dist. Conf. report-a a lan danin nikum khan Bial hrang hrangin Rs. 97,935/- kan chhung lut a ni. Hemi a\ang hian kan Bial chhunga mi 13 hnenah thilpek pek a ni nghe nghe.

Rualbanlo te Ni leh midang te :

Baptist hian November Pathianni hnuhnung berah Rualbanlote Ni hi an hmang \hin a, Presbyterian hian kuminah hian June ni 18 khan an hmang. Pianphunga rualbanlo han tih hian pian tirh atanga rualbanlo sa te, accident avanga rualban zo ta lote pawh an awm a, rualbanlo te hi khawvel sorkar hrang hrangte hian an ngai pawimawh em em a, an pualin khawvel ram hrang hrangte hman turin December ni 3 hi Rualbanlote Ni, ‘World Disability Day’ ah an lo puang ta hial a ni.

Rualbanlo chu enge??

Mizoten Rualbanlo kan tih hi Sap\awngin Disabled people/person an ti a. Tunlai chuan ‘Disabled’ Thil ti theilo pawh ti phal tawh lovin ‘Differently Abled people/person’ an ti tawh nghe nghe. ‘Disabled’ han tih khan thil engmah ti thei lo ah kan chhuahin a lang a, thiam taka ‘Differently Abled’ an lo ti ta hi a fuh khawp mai. Mizo\awng chuan dah dawn ta i la, ‘Thil engmah ti thei lo ni bik lovin mi pangai tih dan ang lo deuha an tih theih dan danglam deuh hlek’ tihna a ni thei ang.

Rualbanlo an tam :

Mi thiamte chhût dân chuan Khawvêl mihring za zêla panga (5%) hi Rualbanlo an ni a, rualbanlohna hi rilru lam chauh te, taksa leh pianphung chauhva rualbanlohna te, a pahniha rilru lam leh pianphunga rualbanlohnate a awm thei a ni. Rualbanlohna chhan hrang hrang a awm a, nuin nau a pai lai atanga fel lo awm thei atang te, piantirh lai thil awm dân leh naupan laia natna vei atang te, ei \ha tlâkchhamna avang te, leh Mizovin, ‘Piansualin tlai luat a nei lo’, an lo tih angin, accident chi hrang hrang avângin rualbanlohna a awm thei a ni.

Rualbanlo leh Mizo te :

Mizote hian rualbanlote kan hmuh dân leh kan ngaihdan hi a \ha vak lo \hin a, kan hmusit deuh a, kan biak duh dan pawh a nawmnah fo \hin a, mi pangngaia chhuah theih pawh kan bawl \hin avanga pangngailo tulh tulh kan nei nual a ni. Hnam changkâng apiangin rualbanlote enkawl an thiam a, rualbanlote hi rilru lama banlo an nih chuan finna zirtîr theih an ni a, mi pangngai angin an zir chaklo a nih pawhin anmahni rau rauvah hma an sâwn thei a, an thiamna zir theih ang ang kha anmahni inenkawl nân leh thil tangkai thawhchhuah ve nân an hmang thei a ni. Tunah erawh chuan heti lam kawngah kan lo harh chhuak ta a, bawl ai chuan khawngaihna nena anmahni chhawmdawl duhna thinlung kan lo nei ta hle a, a Kristianin a Mizo khawp mai. Khawvel pum huap chu sawi loh Mizo zingah pawh rualbanlo lehkha thiam sâng tak tak, mitdel chunga MA passed te, infiamna lama thei tak tak te pawh sawi tur an awm nual mai, kan sawi vek seng lo ang.

            Hengte hian pianphunga rualbanlote hi mipui leh an chhung ten kan en dan a zirin mi pangngai angin, engkim ti ve theiin an nunkhua an hmang thei tih a tichiang hle a. |anpui a hneka, an inkiltawih zual theihna tur leh eng mah ti ve thei lo tura an rilru an tihhniam theihna tur kan zawng zawk niawm taka kan be-chhawhchhi vel \hin hi kan sim a ngai a. An puitlin theihna tur leh midang tih theih ang an ti ve thei tihna thinlung an put theihna atana puih hi kan tihtur a ni.

 Rualbanlo te leh Sorkar :

Mizoram Sorkar, DP & AR chuan thuchhuah siamin Sorkar hna 4% hi Rualbanlo te tan dah (Reserve) tura tih a ni. Report-a a lan danin 2019 thleng khan Rualbanlo mi 60 chuang zet te chu Mizoram Sorkar hnuaiah hna pek an ni tawh a. Rural Development ah pawh AEY 3% hi Rualbanlo te tana dah a ni.

          Tin, Election of India pawhin thuchhuah siamin Polling Station ah reng reng wheelchair a nawt luh theih tur ani an tih bakah EVM ah pawh Mitdel hawrawp te an dah hial ani.

 

DIRECTORATE OF SOCIAL WELFARE & TRIBAL AFFAIRS, AIZAWL, MIZORAM HNUAIA RUALBANLO TANA HAMTHATNA DIL THEIH TE :

1.     Indira Gandhi National Disability Pension Scheme (IGNDPS)- He scheme hi National Social Assistance Programme (NSAP) hnuaia awm niin, rualbanlo BPL category hnuaia awm tena thla tin ₹400 pension an dawn ve theihna a ni.

2.     Disability Pension - He scheme hi state sawrkar funding a ni a, rualbanlote tana thla tin ₹350 pension an lak theihna a ni.

3.     National Handicapped Castes Finance & Development Corporation (NHFDC) Loan Scheme- He scheme hnuaiah hian rualbanlo te tan awlsam zawkin eizawnna bul \anna/zirna senso atan te loan lak theih a ni.

4.     Economic Rehabilitation - He programme hnuaiah hian trade thlan tur hrang hrang awmin ran vulh (vawk & ar) tanpuina ₹4000/- pek a ni a, petty business a thlan theih bawk. Puanthui khawl leh shoe-making thlang te tan a bungruaa pek chhuah a ni thung.

5.     Writer/Scribe Allowance - Rualbanlo zirlaite tan an zirlai exam ziahsaktu rawihna senso bill theih a ni.

6. Handicapped Students Stipend- Mizoram chhunga rualbanlo school (govt./private/special school) la kal mek ten hetiang hian stipend an dawng thei a ni :

Upto Class IV - ₹800/- per head per year

Class V-VII - ₹1000/- per head per year

Class VIII-XII - ₹2500/- per head per year

7.     Unemployment Allowance - Rualbanlo Employment Exchange Office-a in register hna la hmulo te hnenah ₹7800 pek thin a ni.

8.     Training Centre for Specially-Abled Persons - He Training Centre hi Chaltlang & Lunglei-ah awmin rualbanloten eizawnna ngelnghet an neih theih nana din a ni a, hemi hnuaiah hian a thlawn vekin puanthui leh pheikhawk chhe siam a zir theih a. An zir chhungin trainee stipend atan ₹8400 theuh dawng telin course an zawh hnuah bul an tanna tur atana an mamawh hmanrua te pek tel an ni. Hostel mamawh tan a thlawnin a awm theih bawk.

9.     Job Reservation - RPWD Act, 2016 hnuaiah rualbanlo ten sawrkar hna awlsam zawka an luh theih nan 4% quota zuah sak an ni.

10.  Age Relaxation - Rualbanlo Scheduled Tribe (ST) chin te chu state sawrkar hnuaia an thawh awm tawk hna thawk thei turin kum 35+15 ngainat thiamna a awm a ni.

Rualbanlo te leh Bible :

Luka 4 : 18 - 19 : Riangvaite hnenah Chanchin tha hril tura mi ruat avangin Lalpa Thlarau chu ka chungah a awm; a ni chuan salte hnena chhuahna thu leh, mitdelte hnena mitvar neih lehna thu sawi tur te, tihduhdah tuarte chhuahtirna tur te, Lalpa lungawi kum thu sawi tur tein, mi tir a ni.

Marka 8 : 22-25 : Tin, Bethsaida khua chu an lo thleng a. Tin, a hnenah mitdel an rawn hruai a, amah dek turin an ngen a. Tin, ani chuan mitdel kut chu a chelh a, khua ata a kai chhuak a; tin, a mitah chil a chhak a, a chunga a kut a nghah zawhin, “Khua i hmu thei em?” tiin a zawt a. Tin, a han dak chhuak a, “Mihring ka hmu a, thing kal ang maiin ka hmu si,”  ti a. Tin, a mitah chuan a kut a nghat leh a; tin, ani chuan a en reng a, a lo dam ta mai a, engkim fiah takin a hmu thei ta a.

Marka 10 : 51 - 52 : Tin, Isuan amah chu a lo bia a, “I chungah engtia ka tih nge i duh?,” a ti a. Tin, mitdel chuan a hnenah, “Rabboni, hmuh theih ka duh,” a ti a. Tin, Isuan a hnenah, “Kal tawh rawh, i rinna hi i dampui a ni e,” a ti a. Tichuan a hmu thei ta nghal a, kalkawngah chuan Isua a zui ta a.

Johana 5 : 2 - 9 : Tin, Jerusalem-ah chuan beram kawngkhar kiangah dil a awm a, chu chu Hebrai tawngin Bethesda an ti a, hulhliap panga a nei nghe nghe a. Chungah chuan damlo te, mitdel te, kebai te, zengte tam tak an mu hlawm a. Tin, chutah chuan kum sawmthum leh kum riat na mi tu emaw a awm a. Tin, Isuan a mu chu a hmu a, chutiangin rei tak a awm tawh tih a hria a, a hnenah, “Tihdam i duh em?” a ti a. Tin, mi damlo chuan, “Ka pu, tui a fawnin dila mi dahtu ka nei lo va, ka kal chhungin mi dangin mi pen thlak khalh thin,” a ti a, a chhang a. Tin, Isuan a hnenah, “Tho la, i awngphah la la, kein kal tawh rawh,” a ti a. Tin, thawklehkhatan chu mi chu a dam ta nghal a,a awngphah chu a la a,a kal ta a.

Johana 9 : 1 - 7 : Tin, Isuan a kal pahin a pian tirh ata mitdel pakhat a hmu a. Tin, a zirtirten a hnenah, “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zawt a. Isuan, “He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi. Chhun a nih laiin mi tirtu hna kan thawk tur a ni; zan a nih dawn tak hi, chu mi hunah chuan tuman hna an thawk thei lo vang. Khawvela ka awm chhungin khawvel entu ka ni,” a ti a, a chhang a. Chutianga a sawi zawh chuan leiah chil a chhak a, chil chuanin hlum a siam a, tin hlum chu a mitah a hnawih a, tin, a hnenah, “Siloam dilah va sil rawh,” a ti a. (Siloam chu “Tirh” tihna a ni.) Tin, a va kal a, a sil a, mitvarin a lo haw leh ta a.

Leviticus 19 : 14 - 15 : Bengngawng chu anchhia i lawh tur a ni lo va, mitdel hmaah tlukna i dah tur a ni hek lo va, i Pathian chu i tih tur asin: Kei hi LALPA chu ka ni. Rorêlnaah chuan fel lo takin in rel tur a ni lo; mi rethei i thlei tur a ni lo va, mi thiltithei i zah chuang tur a ni .

Exo 4:11 : Tin, Lalpa chuan  a hnenah, “Mihirng ka hi tu siam nge ni a, \awngtheilo te, bengngawng te, mivar te, mitdel te pawh hi tu tih nge ni? Kei Lalpa hi ka nilovem ni?” tih khan hmu a. Pathian siam tho niin  aropuina tura a siam te pawh an ni.

A PAWI LO (IT IS WELL)

A PAWI LO (IT IS WELL)

07.02.2013

It Is Well With My Soul

When peace like a river, attendeth my way,

When sorrows like sea billows roll;

Whatever my lot, Thou hast taught me to say,

It is well, it is well, with my soul.

Refrain:

It is well, (it is well),

With my soul, (with my soul)

It is well, it is well, with my soul.

Though Satan should buffet, though trials should come,

Let this blest assurance control,

That Christ has regarded my helpless estate,

And hath shed His own blood for my soul.

My sin, oh, the bliss of this glorious thought!

My sin, not in part but the whole,

Is nailed to the cross, and I bear it no more,

Praise the Lord, praise the Lord, O my soul!

For me, be it Christ, be it Christ hence to live:

If Jordan above me shall roll,

No pang shall be mine, for in death as in life,

Thou wilt whisper Thy peace to my soul.

But Lord, 'tis for Thee, for Thy coming we wait,

The sky, not the grave, is our goal;

Oh, trump of the angel! Oh, voice of the Lord!

Blessed hope, blessed rest of my soul.

And Lord, haste the day when my faith shall be sight,

The clouds be rolled back as a scroll;

The trump shall resound, and the Lord shall descend,

Even so, it is well with my soul.

He hla hi mawi ka tih mai piahah a thu hi a tha ka ti a, a phena thu inthup hi ka hai chhuah phah ta nge nge a. Midang tan thawkna vak lo mahse ka nunah thu a sawi tlat. He hla phuah a nih chhan leh a phuahtu hringnun ka ngaihtuah hian "Heti khawp hian ani maw mite hian Pathianah an rinna an lo nghah le," tih hi ka ngaihtuah a ni. A phena thu awm ka ziah chhuah hi a famkim lo hle a, tul leh pawimawh ka tih chin chauh ka dah chhuak a, chhiartu zawng zawngten Pathian ropuina in hmuh ngei ka duh e.

He hla phuahtu Haratio Spaffords hi Oct. ni 20, 1828 khan Chicago-ah a lo piang a, a thian chu lar zualte chu DL Moody leh hla phuahtu lar tak Ira D Sankey te niin a  nupui hi Anna Larsen a ni a, Norway mi a ni thung. Dan hremi hlawhtling tak niin an thiante rawngbawlnaah an nupa hian nasa takin an pui bawk thin. An vanduai angreng hle a, an fapa neih chhun chu kum 4 mi niin 1870 khan Pneumionia vangin an chan a. A eizawnna huang zauh mahse kum 1871 khan a thawhna Chicago chu a kang vak a, a hmingah the Great Chicago Fire tiin an vuah nghe nghe. Hetah hian mi 250 an thi a, mi 90,000 chuang In leh lo nei lovin an awm bawk a. Spaffords a pawh a bang bik lo. Hetih lai pawh hian an chhungkua  hian heng in leh lo neilo thenkhatte chu enkawlin, inhliam leh na neite an tanpui a, ei leh in ngaihtuah sakin Krista hmangaihna chu a takah an chantir thei a.

A nupui hriselna a that vak loh avangin kum 1873-ah Europe lamah chawlh hmangin an chhungkuain an zin a. An zinna ber hi Britain velah a ni. Chawlh hman mai piah lamah a thian hnai tak, DL Moodya’n England-ah rawng a bawl dawn tih a hriat avangin a rawngbawlna tawiawm a duh vang a ni pakhat a. Hetah hian hun engemaw chen an cham a. A sumdawnna lama tihfel tur a awm avangin a nupui leh fate 4, Anna Annie (kum 11), Margaret Lee (kum 9), Elizabeth Bessie (kum 5) leh Tanetta (kum 2) mite chu Lawngin a thawn haw a. Lawnga an chuan lai, Nov ni 22, 1873 ah chuan an chuanna lawng, Ville Du Havre chuan tawhsual a tawk a, minute 12 chhung lekin a pil ta mai a. Hetah hian Passengers 307 zinga 226 in nunna an chan a. Heng zingah hian Spafford-a fate 4 pawh telin a nupui erawh a dam chhuak ta hlauh a ni. He thu hi Telegram dawngin an chhiat tawhna hmunah hian a nupui thlamuan turin a kal ta nghal a, an chhiat tawhna hmun a thlen chuan a nupui lungngai taka lo awm chu hnem pahin he hla ropui tak hi a phuah ta a, 

"Khawvel hrut chhuak ila Lal Isua ang hi,

Thianghlim leh fel ka hmu lovang.

A nunna min pek avangin ka fak ang

Hrehawm tuarin rethei mah ila” 

tiin a  au chhuak thei a ni. Hemi rual hian a nupui tawngkam hi a mawi em mai a, kan tarlang ve reng reng teh ang. "Pathianin fanu 4 min pe a, min lak sak leh ta a. Engtik niah emaw chuan engvang nge tih hi ka la hrethiam ngei ang," tiin a tawng chhuak.

Kum 1878-ah fanu Bertha an nei leh a, hei pawh hi kum 4 mi chauh a nih laiin a boral leh ta mai a. 1880-ah fanu, Grace-i an nei leh a.  Kum 1881 Sept. thlaah chuan  America chhuahsanin Israel-ah an pem ta nghe nghe. Hetah pawh hian mirethei tanpui thintu Pawl pakhat,  American Colony an tihah chuan an la inhmang zui zel a. Kum 1888 Oct. ni 20 khan Malaria vangin a boral a. Mt. Zion Cemetery, Jerusalem-ah an phum a ni.

Hetianga vanduaina leh harsatnain a bawm reng emaw tih mai tura an nun an hman lai pawh hian Pathian lakah an vui ngai lo reng reng hi a ropuiin an entawn tlak khawp mai. Mihring rilru chhuakin Pathian a awm talo mai em ni ang? tih tur dinhmunahte pawh an ding tih a lang reng mai a, duh nisela kir lehna rem chang a tam lutuk ang tih a rin theih a. Nimahsela, Pathian laka vui chu sawi loh an la fak zawk thei hi a ropui lai tak a ni. Hetiang nun nei thei tur chuan Pathian a innghat tak tak nih a ngai ngei ang a, Pathian remruat lawm taka pawmtu nih pawh a ngai ngei ang. An nun leh khawsakna khawvel ni mahse Khawvelah an rilru an nghah loh pawh a ngai ang tih a chiang reng mai.

THE OLD COAL BASKET

The Old Coal Basket :

21.02.2014

Kentucky hmar lam, tlangin a hual vel hmun mawi leh thengthaw nuam takah chuan Putar pakhat leh a tupa naupang te hi an khawsa dun a, tuktin hma takah thovin Putar chuan an choka ah chuan Holy Bible hi a chhiar thin a. A theih ang tawk tawkah a tupa chuan entawn se a duh avangin entawn tlaka nun a tum hram hram ṭhin.

Nikhat chu a tupa chuan,"Ka pu, nitin i tih ang hian he Bible hi ka chhiar ziah a, nimahsela a awmzia ka hre thiam thei lo reng reng. Ka chhiar apiang hi ka khup veleh ka theihnghilh nghal zel bawk sia. He lehkhabu chhiar dan ṭha ber tur hi engtin nge ni ang?"tiin a zawt ta kauh mai a.

Putar chu ngawirengin a inher vut a, inngaihtuah buai pawh awm chuang lo chuan Lungalhthei dahna bawm (Basket) chu a pe a, "Hei hian Lui-a mi Tui min va chawi ta che," tiin a tir ta daih mai a. A tupa pawh chu thuawih takin a kal ve mai a, mahse a bawm ken chu phui lo, kaw siar siar a nih avangin a tui thal apiang a put zo zel ta mai si a. In a thlen meuh chuan Basket chu a ruak mai a lo ni a, a lungawi lo hle nghe nghe. A pu lah chuan nui chunga "I hmanhmawh leh zual a ngai a nih kha," tih pahin Lui lamah chuan a tir leh a. A tupa chu a tlan chak tawh ngei mai. Mahse hmasawnna a awmlo, a ngaitê bawk tho a ni. Kâa thawk lenglo khawpin thei leh thei lovin a pu hnenah chuan a let leh a, thil tihtheih loh tawp a nih chu hrilh pahin a aiah Bucket a la ta zawk a. Putara lah chuan "Bucket-a khai turin chein ka ti hleinem, Basket kher kha alawm ka duh. I la bei nasa tawk lo a nih kha," a lo ti sam et mai si. Naupang chu a beidawng tak zet tawh a, a hah bawk si, kut pahniha khup dawma kun chungin thawk a la kâwk kâwk a, a bul vela boruakte chu hip zawh vek a tum emaw tih mai turin. Chutah, a chil a'n lem khawlh a, muang changa rawn dâk chhuakin a pu chu an en vang vang a. A kal leh ta nge nge a, a pu chuan a tupa kal chhuak ta chu a thlir reng a.

Chutah zet chuan a tupa naupang chuan thil tih theih loh tawp tih tir a nih chu a hrechiang ta hle mai. Nimahsela, a pu duhdan tihpuitlin a duh tlat avangin hah thikulin hmanhmawh theihtawpin tum hnih lai chu a tlan leh ta nge nge a, Basket ruak bak In a thlen thei chuang lo. Thaw tha hlei thei lo chung chuan, "Tangkaina pawh awm hlei lo," tiin a au ta vak a. A pu chuan "A tangkai lo i ti elo? Uluk takin Basket kha han en teh," tiin a Basket ken lai en turin a ti ta daih mai. Naupang chuan uluk takin a Basket kenlai chu a han en a, hemi tum hian tlemin a danglam tih a zuk hre nghal a. A hma kha chuan Lungalhthei dahna bawm a nih avangin a dum kheih khuih kha a ni a, tunah chuan a chhung leh pawn lam te chu a lo fai ta hliau mai. Bal chambang pawh a awm ta lo.

Chutah chuan Putar chuan heti hian a ti ta a. "Ka tupa, khâng thil thleng kha theihnghilh ngai suh ang che. Pathian Lehkhabu i chhiar ang chiah kha a ni. I hrethiam lo a ni mai thei, i hre reng thei lo pawh a ni mai thei. Mahsela, uluk taka leh tihtak zeta i chhiar i chhiar chuan nangmah kha i la danglam dawn a ni. Chu chu thlarauthianghlim hnathawh a ni a, damchhunga mi ropui nihna leh thlarau chenchilh nihna awlsam tak mai chu Bible chhiar hi a ni," tiin. A tupa pawh chuan hrethiam tak chunga buk nghauh nghauh pahin a Basket ken lai chu a dah ta riai riai a.

I nunah Pathian lo cheng reng tura i duh chuan a thu Bu hi chhiar ngun la, kawngthalo lakah a hum chein kawng dik a kawhhmuh ang che.

(Hei hi kum 2014-a kan thianpain thawnthu tawi min rawn thawn atanga ka zeldin belh a ni)

MARI I HRIA EM?

MARI I HRIA EM?

Luka 1:38 Tin, Marin, “Ngai teh, Lalpa bawinu ka ni, i thu ang zelin ka chungah thleng  rawh se,” a ti a. Tin, vantirhkoh chuan a kalsan ta a.

He thu hi Mari sawi a ni a, thusawinaah pawh kan sawi tam ber pawl leh Krismas Sermon kan ngaihthlak tam pawl a ni mai thei.

He thu hi heti zawng hian kan ngaihtuah ngai emaw chu? Mari hian a nau pai tur nun kal zel tur hi a hre lawk dawn miah lova, engtiang takin nge a thanlen dawn? Engtinnge a hun tawp a hman dawn? Engtiang taka thunei tur leh thiltithei tur nge tih pawh a suangtuah thiam loh bakah a suangtuah pha kher lovang.

A fa lo piang tur chu engtik niah emaw tui chungah kein a la kal dawn tih pawh a ngaihtuah phak lovang a, leia mihringte thihna lakah a la chhandam dawn tih pawh a hre dawnlo hrim hrim. Mihringte nunthar min pe a, van khua leh tui ni turin min la siamthar dawn a ni tihte hi a hre ve angem le.... A fa hrin hian amah zawk a hring thar dawn tihte a hria angem le...

Mary, did you know

That your baby boy will one day walk on water?

Mary, did you know

That your baby boy will save our sons and daughters?

Did you know

That your baby boy has come to make you new?

This child that you've delivered

Will soon deliver you

Israel ram dung leh vang fangin amah avangin mitdelte mit a lo var ang a, a tawngkam khat avangin thlipui leh ruahpui leh tuifawn a la reh hmak dawn a ni tihte a hre lâwkin ka ringlo. Van Angel-te kawng sialsa a la zawh dawn a ni tihte phei chu Vana rah ang chauh a ni ang. A fa hrin lo piang a fawh ngawih ngawih lai kha Pathian a ni reng tih pawh hre lâwk dawn lo reng reng.

Mary, did you know

That your baby boy will give sight to a blind man?

Mary, did you know

That your baby boy will calm a storm with His hand?

Did you know

That your baby boy has walked where angels trod?

And when you kiss your little baby

You've kissed the face of God

A Pathianna aTangin tisa damna nasa lutuk a thleng ang a, mitdelte mit a var ang a, bengngawngte beng a lo var ang a, mitthite hial an tho leh ang tihte hi mang lam pawha a man phak loh tur hlir a ni. Kebaite pawh lo damin an kal pangngai a ni mai lova, a zuanin an zuang nghal thei a, tawngtheilote pawh tihdama awmin an lo tawng thei ta mai a, Beramno (Pathian) fakin an au chhuak nghal dawn a ni tihte pawh a hre lâwkin a rinawm loh.

Mary, did you know? The blind will see

The deaf will hear And the dead will live again

The lame will leap The dumb will speak

The praises of the Lamb

A fa lo piang tur chu engkim siamtu Pathian a ni tih reng a hriat dawn loh bakah a rilruah a awm phak dawn lo hrim hrim a. Hnam zawng zawng tlan turin a thi ang a, a lo kal leh hunah ro a la rel sak dawn a ni tih phei chu a hriat ruala tluk phah tawpna tur khawpin mak a ti dawn. A fa hrin chu Pathian, Beram No, Khawvel sual kalpui tur a ni tih reng reng a hre dawn der si lo. 

Fa a hring ta ngei a, khawvawt hnuaiah a lum loh hlauin a kuah chial a, a puan neih ang angin a tuam lum a, a hmangaihna neih zawng zawng nen a kuangkuah a, a dam khawchhuahna turin engmah tih a hreh lova, a nau neihnaa a na tawrh chuan nunna lo awm tantir tinung zel turin a tihnual thei lo. Chuti khawpin amah inhlan mahse a fa hrin chu Lei leh Vana lal ber Pathian, engkim tithei JEHOVA/AWMA (Exodus 3:14) kha a ni tih a hre sa angem le aw...

Mary, did you know

That your baby boy is Lord of all creation?

Mary, did you know

That your baby boy will one day rule the nations?

Did you know

That your baby boy is heaven's perfect Lamb?

This sleeping child you're holding

Is the Great I Am

Oh Mary did you know?

Heng zawng zawng hi hre lâwk miah lo mahse a hnena Pathian thu lo thleng pawm turin a inpe hmak thei a, a tawn tur zawng zawng a ngaihtuah thei lova, Pathian thu thlenna tlak a ni kha a lawm em em zawk a, a hlim em em zawk a. Chu inpekna thuk tak leh inpumhlanna chuan mihringte chhandam tura mihringa lo changa, hrin ni tura Pathian hringtu ni turin a tlin tir ta hial a....

(He hla hi 1984 kuma Mark Lowry-a ziah chhuah niin a thluk leh Music hi 1991-a Buddy Greene-a ziah a ni thung a. Michael English khan 1991-a Krismas Album a siamah khan a record a, chu chu origibnal record atan an pawm a. Heith lai hian athu ziaktu leh a recod-tu te hi Gaither Vocal Band member an ni a, a thluk leh music siamtu pawh hi an zinkualnaah a tel ve thin nghe nghe)

2023 GENERAL ELECTION THLALAK