Tuk khat chu ka zing exer la hian naupang ho infiam ka hmu a, an infiamna chu infiamna ropui a ni lova,khawvel hriata larpui tlak phei chu a ni lo leh zual. Ram pawn a han phochhuah atan phei chuan duhawm lo tak ani. Engtikah mah khawvel hian khawvel huap infiamnaah hian a pawm dawnlo hrim hrim tih pawh midangin min hrilh lo mah se ka hre ve hrim hrim. Chu an infiamna chu engdang nilovin, keini pawhin kan naupan lai pawha kan lo tih ve fo thin, zawngtah bilbawlawk an lo vua a. Chu chuan ka lung te pawh a ti leng ve hial mai.
Chutiang a kan inkaihthawh kim hnu chuan tlan ta lem lovin Zawngtah bilbawlawk zawng turin kan kal nghal hmiah. Chhar tam nih kha thil ti thei nihna a la ni a, hawi vah na tham a tling thin. Kan School, Primary School-V bul ami kha a chang tha ber turah kan ngai a, chuta mi chu kan zawng hram hram thin. Zan lamah te kan hauhlawk thin nia mawle.. Chu bakah chuan Pu Vaia (in hre ve kher lovang) te huan ami kha kan zawng ve ziah bawk. Mi huan a luhruk te chu thiam tak kan ni, ping ngai hek lo...
A tla kan hmuh theih ang zawng zawng kan chhar zawh hnuah chuan hmun rem lai deuh kan zawng a, school tual zawl a ni tlangpui. Chutah chuan kan invaw ta thin a, nuam ve mai mai tak a ni. Phakar fal kan awm ngai lo. Fair takin kan infiam thin.
Khatih hunlai khan kan rilruah itsikna in hmun a chang lova, thianghlim takin kan nung mai a ni. Naupan lai riru kha a lo van thianghlim tak em!!! Zawngtah bilbawlawk vuakah khan kan lungawi tawk ve em em.
Kum tam la ral lo mahse kan tun hun nen hian a van danglam tak em!! Duh zawng kan lei thei a, kan nei a, kan lungawi chuanglo. Kan mamawh aia tam kan chhek a, kan rilru tihah tu mai. Lungawina hian kan nunah hmun a chang ta lo emaw ni chu aw tih theihin kan lo khaw sa zo ta hlawm a. Nei im em chungin mi ta kan la hmu lian leh zel bawk si... Sum kan thawkchhuak a, kan indaih chuanglo. A sum ngah ngah hi an duham nimai hian ka hria.
Heng bakah pawh hian tam tak sawi belh tur pawh a awm ang. Thianghlim tak a kan nun hun lai, zawngtah bilbawlawk kan vuak lai hun kha a lo la hlimawm berin ka hre ta. Khatih hunlai kha chuan mawl hle mah ila kan rilru a la thianghlim a, kan hlim tlat alawm……..
13 comments:
Hringnun hi chu hetiang hi a ni reng asin....hlimna leh lawmna a la hniam viau chuan kan nun hi a ngaihtuah awm loh ka ti thin.Rs.10000 a tam lo kan tih hunah phei chuan hringnun hian awmzia a nei kher tawh lo mai thei asin.Chuvangin kan hun hi hman thiam a ngai hle.Hlim leh hlawk thei ang bera kan hman a tha.
Kan naupan lai chuan keipoh kan kawmchhakah pear thei tla kan chhar thin a,khang hunte kha a hlimawm daih zawk asin tun hun ai chuan.
Zawngtah bilhbawlawk vuak vel hi chu ka ti ve hrep tawh:) "Khatih hunlai"-ah khan min hruai let leh a, ka lung te pawh i rawn tih len thar leh tak hial avangin lawmthu kan hrilh hial teh ang che!
St. Augustine-a thusawi ropui, "You have made us for yourself O Lord, and our hearts are restless until they find their rest in you," tih kha ka hrechhuak daih mai...
hahaha lung i va ti leng ve...naupanlai a nunchan zir tak tak lai hi chu nuam tak a ni..ka enjoy top i thilziah hi.
I thuziak ka chhiara ka ngaihtuahna lo lang chu, kawl rama mizo naupang te leh mizorama naupangte hi kan lo va in ang em em ve aw tih hi a ni.
Tahana piang ka ni a, kan naupan lai khan mizoram chanchin kan la hre ve lova, kan khawtlang bak kha kan hre lo a ni ber e.
Mahse Zawngtah bilbawlawk zingah kan zawnga, a tuvu phei chu a zu a thlum ve thin a vangin kan fawp thin a. Sephungte (kan koh dan chu- Chêp) pawh kan lai ve thin a, kan insiktir thin.
I thuziak chuan lung a tileng hle mai
burgerstud2005 :
Nia tiraw, Rs 100000 hi kan Rs 100 hman hun pawh a lo la thleng maithei. Chutih hunah chuan hringnun hi engtiang takin awm nag maw???
faka :
A dik khawp mai, Pathian a innghah ngam tak tak hi a lo har em a nih hi. I lungte ka lo tihlen theih chuan a lawmawmah ngai ang
sawmpuia
A lawmawm e. Naupan laia pilh phengphung khawpa Shillong hling kan bawh en lai te pawh kha a lo rei ve fu tawh mai. KAn hlim em em tho thin anih kha. Kei pawh ka lung a ti leng em a, he thu hi a lo chhuak ta a nih hi
Puibawiha
Keini paw'n a zu kan fawp kerh2 zel. A bilbawlawk hian Helicopter lem kan siam a, kan khalh thin. School ah te kan pai thin nia mawle
Khaih aw, a va han na duh awm veleh. Tak takah naupanlai kha a ngaihawm thin ngawt mai - Nilenga sikul kai pawn tlai lamah chuan kan la harh peih tho a. Enghelh leh dang awmchuanglo chu kan hlim ve em em a.
Kan hotupa sawi ang deuhin, 'Khawvela ka tum zawng zawng chu ka hlen tawh, a chhanchu ka tum ka ti sang lemlo a" a tihte pawh min ti hrechhuak e. Rualawt em em lo ila kan hlimber maiin ka hria.
chhangte_II
A dik khawp mai. Midang hi dahsang bik em em lo phawt mai ila kan hlim a ni mai
e i ziak ngaihnawm thei khawpz mai. Kan khaw chanchinbua chhuahah ka lo copy teh ang phal em?
dolien
A lawmaw e, keia thuziak ve tehlul min lo ngaihhlut sak a. A engber hi nge i chhuah duh?
Phalloh thu a awm nang le...
means = artikul huang kan nei a, artikul ziaktu erawh kan tlem thei lutuk, ka duh deuh vek mai... i hming nen hian ka lo la chhawng mai ang chu :)
dolien
Aw le. Min lo hlutsak a ka lawm
Awii.. keini pawh zwngtahbilhbawlawk hi kan vaw nasa thin, nuam thei.. hmanlai min ti hrechhuak hle mai.
Chuti maw? Nia a hun lai kha chuan nuam ve deuh asin.
Post a Comment