Chu Beram ven zanlaiah chuan

Chu Beram ven zanlaiah chuan

- Zorema Hlondo

Chu Beram ven zanlaiah chuan

Van hla ropui takin a lo thang 

A thunawn chu lawmin a khat,

Angel hoten chu hla chu an sa.

Berampute chuan Phulah an Beram te chu an veng a, chumi zan chu dang zawng aiin a vawt emaw tih tur a ni a. Thli a thaw deuh her her a, zan dang ang thovin khua pawh a thiang vuk mai a. Arsi te pawh a lang pe uar a, chumi ti mawia ti engzual turin Thla pawhin a eng ti chuai duh bik hek suh, tu eng eng an ti ni ber hian a lang a. Berampute vawt ti chuan Mei chhepin an kil bial tai mai a, a thenin thutphah atan Lung rem deuh an hmang a, a thente erawh chu hnim chungah engmah phah lem lovin an thu mai a, a thente erawh chuan Hnah an thutchhan bawk a. An tunhma nun te, nupui nei tawhte pawhin an nulat tlangval lai chanchin te dawt pawi lutuk lem lo tel ti tih hian an sawikhawm let let a. A chang leh an han nui deuh hak a, an chanchin atangin an in kap fiam tak bawrh bawrh bawk a. Chutih lai tak mai chuan Thla chu hnaitea pawhhnaih a ni ta emaw tih mai tur hian an vel chu a lo eng ta pup mai a, hmelmain an rawn bei dawn nia lo ngai hmanta te pawh an awm nawk awm e. Hmelma lam erawh a lo ni lova, Van Angel ten an hnenah hla rawn sain an rawn Carol a lo ni lek si.

Chungnungberah ropui rawh se

Lei chungah remthu chu leng rawh se

Tin, Chatuanah thangkhawk rawh se

Lei chunga mi lawm rawh se...

An hla sak chuan pawi hi an sawilo mai mai khawp a(h)... "Lei chungah remthu leng rawh se" tiin Van Angel te chu an rawn zai ta dep dep mai a, eng zaipawl mah hi a khan tur hi an awm lo hrim hrim mai a, kum engemaw zat hnu pawha lung la tileng thei, rilru la dek tuiral thei tur hla a ni. Khawvelah hian inremna lo awm sela, mi tinrengte chu hlim leh thlamuang takin awm se, chu remna leh hlimna chu tawp mai lovin awm reng se tiin hla an rawn sa a ni. Hlaphuahtute hla phuah satliah mai mai a ni lova, mihring ngaihtuahna atanga phuah chhuah chi lah a ni hek lo.

Beramputen ropui an hmu,

Ngai rawh u enna thu chu a ni;

Tluin chibai an lo buk a,

Hla mawi ropui takin a nghawr vel.

Berampute thil tawn chu thil namai a ni hauh lo. An zai ri chu a mawi a ni satliah lova, an zai ring pawh a ni hran lem lo. Mahse a thawkna ngang mai a lo ni a, an awmna te chu a nghawr dur dur thei a, tunlai Sound Sysytem tha uchuak tawh lutuka Sub Woofer nghawr dawt dawt hian a phakin a rinawm kher loh. Mihring kutchhuak ni miahlo, hla mawi em em mai, an awmna nghawr dur dur thei an han ngaihthlaka an han hriat meuh chuan an tan thut ngheh ngaihna awm ta lo chu an tlu sawp deuh niai mai a, chutih mek laiin an hnena rawn zaite pawh chu ngaithla liam mai lovin chibai an buk pah bawk a. 

Chhandamtu, Pathian Sahriak thih,

Kan bat chu pe turin a lo kal;

Lungngaih leh hrehawm chu tuarin,

Beramno kan sual kalpui tur chu.

Berampute hnenah chuan "An tan CHHANDAMTU a lo pian thu" chu an han sa chhuak ta a, chu chu Isua Krista ngei mai (Hriakthih-Messia) anih thu te an hnenah chuan puanchhuahin a lo awm ta a. Chu Isua Krista chu ama thiam loh leh tih sual ni miah lo, A ma siam zawk mihringte bawhchhiatna avanga Pathian mi ni tawh lote tana tuar turin chu zan khawvawt tak hnuaiah chuan In lum tha pawh nilo, Ran Inah lo piangin ran chaw pekna thlengah muttirin a awm mek chu a ni si a. Hrehawm nasa tak mai la tuar tur a ni a, amah avanga khawvel miten chhandamna kan chan theihna tura nun hlantu tur a lo ni reng si. Chung thil zawng zawng chu Berampute hnenah chuan puanchhuahin a awm a ni. Hna hnuaihnung thawk an ni a, mi hnuaia inhlawhfa pawh an ni lovang tih a sawi theih loh a, mi hausa tak an ni lovang tih erawh a lang thei mai a, chung mite hnenah pawh chuan Vantirhkohte an inlarin Pathian Pathianna thuruk leh khawvel a rawn kal chhan te pawh puanchhuahin a lo awm ta hial mai.

Pathian thu hian thlen duhlohna bik a nei lova, mi zawng zawng hi amah nen inrem turin min duh a, chu remna Palai hna thawh leh remna neih chu mi chapote nunah ni lovin mi inphahhniam te leh mi nuntlawmte nunah a ni reng zawk si. 

Unau duh tak, i thinlung kha hawng la, remna nei turin in phah hnuai la, khawvel mite mikhual mikhual theih loh Isua Krista chu mikhual mai nilovin LALNA chan tir la, he hunpui, Krismas lo thleng tur hian i pang tina suh se. Hmangaihnain luang chhuak la, tui reng reng a chhoh luan ngai lo angin midangte tana malsawmna ni turin i rilru tihniam la, a pawimawh ber Pathian nena inremna i neih theihnan Pathian thu zawm duh lo/theilo tura CHAPONA leh i INDAHSANNA kha thiahin lo awm rawh se.

He hla phuahtu Rev. Robert Lowry hi Philadelphia, Pennsylvania ah March ni 12, 1826 khan a lo piang a. University at Lewisburg (tuna Bucknell University nita) ah Pathian thu zirin1854 ah a zirchhuak a ni.

Nupui neiin fapa pathum a nei a, Plainfield, New Jersey ah November ni 23, 1899 khan a thi a, Hillside Thlanmualah phum a ni.

Hla tam tak a phuah zinga hmun engemaw zata a tel lova Krismas hman harsa khawpa kan sak, "Chu Beram ven zanlaiah chuan" tih hla hi Doliana'n Mizotawnga letin kum upa lam tawhte mittui ko chhuak fo tu a la ni reng a ni.