PSM GRADUATION DAY THLALAK 2022

2019-2021 Course atan Penetecostal School of Ministry-ah Certificate of Theology zir tura lak ka ni ve a, kum thum zhhung zir tur a ni a, zirlai bu 21 zir a ngai bawk. 2019 N. Mizoram District Board hmaah kan han inlan a, hemi tum hian General Licence ka dil bawk a. Licence Interview kha PSM Interview atan min rin tir nghal a, result a lo chhuahin zirtura lak ve ka ni kha ka lawm hle mai. 

A kumkhatna :

Kum 2019 May thla chawhnu lam a lo ni a, ka phur hle mai a. Ka thawhna Office-ah kan pute hnenah chawlh ka duh thu leh ai kal lak mai ka duh thu ka sawi a. A tirah chuan an remti chiah lo nain kan SDC pakhat min sawipuina zarah min phal sak ve ta. June thlaah PSM zir tur chuan NMD Hqrs. Biak In ka han thleng ve rawih a, ka zirpui turte zingah hmelhriat ka nei mang lo. Ka mikhual hawi lek lek a. Registration Day te hmangin zirna kalpui tan tur a ni ta.

Hqrs. Biak Ina PSM zirna atana Pindan hran an lo siamah chuan kan thukhawm ve ran a, tlar hmasa berah pawh a laiah kan thu ve kâk a. Ka veilamah Evan. Sangtea a thu a, ka dinglamah Unaupa Remruatkima (Mama) of Sialsuk a thu bawk a.

A tirah kha chuan ka zam ve deuh hlek a. Kan CR kha Evan. Peka a ni a, a fel khawp a, hetih lai hian District PYD Treasurer a ni nghe nghe. Kalphung leh zirdan mai piahlamah zirna ina kan awm chhunga nungchang turte, thawmhnaw hak turte thlenga hrilhchawp ngai kha kan ni a.

District lam hian mi ina kan khawsakna senso bakah kan nitin ei leh in tur mai ni lovin, zir tura kan kal leh haw man piah lamah kalkawnga kan ei leh inna turte nen lam an lo pe thin kha a lo ni a, mi vannei an tihte zingah ka tel ve ta reng mai.

Chhunah hian Thingpui dawrah kan chawl thin a, tlema District min tumsak bak mahni sum hmang tel pawh kan awm nual awm e.

Class test te neiin hun tawp lamah kan Exam ta a, result a lo chhuah chuan pakhatna ka ni ve ta hlauh mai a. Ka zir tam loh ngaihtuah phei chuan a zahthlak lek lek mai. Exam zawhah Graduation Day hman hmain Senior te ruahman angin chaw kan han eikhawmte kha a ngaihawmin a lunglenthlak mange.

Graduation Day-ah intinalh takin kan tel ve a, ka vawikhat telna a ni bawk a, nuam ka va han ti tak e aw... Ruai kan la theh zui. 

Heti hi a kum 1-na chu.

Kum hnihna :

2020-ah hian a kum hnihna zir tur kan ni a, Covid-19 alo darh tak avangin a hun pangngaiah kan kal thei lova. Hruaitute remhriatna azarah Online in November, 2020 chhungin kan kal a, December thla tirah kan exam kha a ni a. Graduation Day pawh kum 2021 January thlaah hman a lo ni ta a.

Hemi kum hian kan Assignment neihte kha ka hlawk pui kher mai. Class kal bawk silova a bu entawn lova exam ve tawp chu a har duh angreng a. Ka la hriat reng chu kan zirlaipui pakhat khan harsatna a tawk ta tlat mai a, online Class a kal chhunzawm thei tlat lo. Zirpuite remhriatna avangin kan theih ang tawk tawk sum kan thawhkhawm a, Redmi 9 (?) kan lei sak ta a. Unaupa Thatea leh Unaupa Puia Fanai ten an inah an pe thlap nghe nghe a. Khati khawpa Zirlaite kan inhmangaiha kan inngaihsak kha a ropui mange aw....

Kan exam lai hian kum 3 ka lo pamtul pui tawh, CCC (Computer) exam lai a lo ni hlauh mai a, kan subject zirtirtuin hun min siam rem sak hlauh a, a 2-a ka hlawhtlin theihna tura rem min ruat pui hi ka lawmna a reh tawh nbgai lovang.

Graduation Day te a lo ni a, result a chhuah meuh chuan hemi kum bik atanah a titha ber ka ni leh hlauh pek a. Mak ka tiin ka awi lo lek lek zawk a ni.

A kum thumna :

Kum 2021-ah hian Final tur ka ni ve tawh a. Covid-19 avangin hemi kum hian kan kal thei lova. Mahse, CBC lam remtihna leh hruaitute remhriatna avangin Pentecostal Camping Centre, Sakawrtuichhun, NMD UPC-in a enkawlah Camp tur a ni an rawn ti ta thut mai a. Kum 2021 Course kha kum 2022 January ni 5-ah Registration hman tur tih hriattirna kan dawng a. A huphurhawm veu veu hle mai. 

He thu ka hriat tirh hian ka thawhna lamah cahwlh dilna ka thehlut nghal a, an ngaihtuah a, thla 1 tawp chawlh chu an remti hlei thei lova. Registration hma zan, January mi 4 zan dar 7:06pm-ah Whatsapp lamah chawlh phalna ka hmu ta hlauh mai. Ka insiam nghal a, thlakhat chhung chhungte kalsan tur chuan phur tak maiin ka Ip-ah chuan ka thawmhnaw ken turte ka khung sawk sawk a, mutbu ka tel a, ka inpeih chu a ni deuh der mai.

Camping Centre hi ka vawikhat kalna a ni a, zirtirtuten min riah pui a. Hemi tum hian tlinglo tak chungin CR-ah min thlang hlauh mai a, a huphurhawm dan chu pui tak a ni.

Zingah Devotion kan nei thin a, Chawlhni chawhma leh zan kan inkhawm thin bawk a. Devotion leh inkhawmahte Thlarau lam hla kan sa a, kan ri tluk tluk thin.

Beisei loh tak maiin Covid-19 in min tibuai ta hlauh a, kan hun hman dan tura ruahman zawng zawng tidanglamin exam hunte pawhhnaih a lo ni ta a. Kar khat zetin kan hun kan pawh tawi a ngaih phah ta nghe nghe.

Hemi tum hian zirlaiten pawisa thawhkhawmin Home Missionary 1 kan chawm thei a, Electric tuilumna 1 chu PSM tan hian kan pe bawk a. ka zirpuite ho han fel zia kha aw.... An zinga CR nih theih kha inchhuanna tham a ni. An chungah ka lawm ngawih ngawih.

Pawn lam atangin ei turte bakah kan mamawh hrang hrang kan dawng thin a, kan hotute hnena mamawh kan thlente pawh rang taka ngaihtuah sak kan ni thin a, an chungah zirlai aiawhin lawm thu ka'n sawi teh ang. Kan hotute leh thilpek min petu zawng zawngte u, in chungah zirlaite kan lawm hle mai.

Dt. 10.3.2022-ah Hqrs. Biak Inah Graduation Day hman a ni a, result puan a ni a, Final result-ah Pakhatna ka ni ve leh hlauh mai. Tin, zirlai aiawha thusawi tura min ruat ve te kha ka va lawm tak aw..... Rev. Laltluanga, Dist. Supt., PSM Principal ni bawkin Degree min hlan a ni. Graduation Day-ah hian District-in Bible tha tak min thilpek atan min pe a, Rev. PC Lalrosanga (Rtd)-ian a lehkhabu ziah min pe bawk a, kan lawm hle mai.  Result an han puang a, Final result-ah PAKHATNA ka ni ve leh hlauh mai, ka lawm ve hle a ni.

Ka Zirlaipuite an ngaihawm a, an bula awm a nawm chu thuhran, a hahdamthlak a, Kohhran an hmangaihzia a takin ka hmu fova, midangte tana malsawmna an nih nasat thin zia kan tawng nitin a, rawngbawltu puitling tak tak vek an ni.

Thui tak ziah tur awm mahse rilruin vawng tha tawh zawk mai ang.

Thutawpna :

Kum 3 chhung zet harsatna karah pawh min zirchhuah tirtu Lal Isua fakin awm sela, lo ropui ber rawh se.

Kum 3 chhunga ka zirpuite leh min zirtirtute zawng zawng chungah thinlung takin ka lawm.

Hetianga kan zir theihna tura kumtin bâng ngailo, PSM sponsor ziahtu District LAD te chungah thinlung takin lawmthu ka sawi mawlh mawlh e.

District Officicals ten hmangaih taka min enkawl a, kan zirchhuah ngei theihna tura ruahmanna fing tak tak an siam bakah kan mamawhte min ngaihtuah sak zel thin avangin ka lawm tak meuh meuh  a ni.