A HUN LEH A HMUN THLIAR THIAM

A HUN LEH A HMUN THLIAR THIAM

Zorema Hlondo

 

Rom 13:7 - Mi zawng zawng hnenah pek tur apiang pe rawh u; leiman pekna tura hnenah chuan leiman pe ula; chhiah chawina tura hnenah chuan chhiah chawi ula; tih tura chu tih ula; pawisak tura chu pawisa rawh u.

 

Kumin kumthar atan he thu hmang hian thu tawite ka'n ziak teh ang.

 

Thil reng reng hi a awmna tur a awm a, a nihna tur a awm a, a awm dan tur a awm bawk a.

 

Kan rawngbawl puite tlin lohna te hi kan duh duhna hmunah kan han sawi pawp mai ṭhin a, a lo dawngsawngtute lakah kan timualpho tih ka ngaihtuah pha ṭhin lo emni ang? tih hi a ngaihtuah theih a. (Chawp leh chilha sawi nghal ngai erawh a awm thei tho awm e)

 

Kan ngaihdan lo deuh hlekin thil a thleng a, kan sawi avanga a ṭhat phahna tur ni miahlote bulah te kan han sawi phawng mai a, chu chuan thil a siam ṭha phak lo a ni mai lova, a tichhe telh telh ṭhin. (Ṭhian ṭha/inngam tlakte inkahna erawh a huam lo)

 

Insiamṭha tura kan duhte bula sawi mai hi a finthlakin thil nih dan tur pawh a ni zawk mah a. Chu chuan anmahni a siamṭha zawk dawn a lo ni reng mai. An hua a nih hlauh chuan anmahni lam an dik lo tihna a ni thung ang.

 

Ṭhenkhat chuan Pulpit-ah emaw awmkhawmnaah te kan sawi mai a, an hriat atana ṭangkai miah lo turte pawh khan an lo hre ve a, chu chuan a chanchin kan sawi kha thlir dan dangin a thlir/hmuh tir phah thei.

 

Committee-a sawi tur, hmun danga sawi tak daihte pawh a awm thei a, a sawt loh chu thuhran nise, Pawl/Kohhran hmel a tihchhiat bakah a ti chak lo leh ṭhin a, thawhhona a tichhe bawk.

 

Miin thuruk min hrilh chuan vawnṭhat pui tlat kha kan hna a ni mai a. Midang bula lo sawi ve dûk dûk kha kan tih loh tawp tur a ni. Thuruk pawh hrilh tlak kan nih a pawimawh.

 

Intih hriat bik luat tuk avangin thil ṭha lo a thleng thei a, chhiat buaihna pawh a thleng thei a. Chuvangin, kan hre bik a nih pawhin a sawichhuahna tur hmun leh hun kan thliar thiam tel a ṭul.

 

Kan lo lungawi lo viau a nih pawhin kan lungawilohnate hnena sawi mai kha a ṭha ber a, midang bula kan sawi a an lo hre leh a nih phei chuan boruak a kal fuh mawh tawh ṭhin.

 

Tin, lungawi lo awlsam em em te hi rawngbawltu puitling tak an vangin ka ring a, lawm chunga rawngbawl tura min tihna hlenchhuah hi a har ṭhinin ka ring. (Mimal rin dan)

 

He thil hi Kohhran huang chhung chauh ni lovin, kan hun leh nun hman hrim hrimah hian a pawimawh a. Hetiang lo ti ṭhin kan awm a nih hlauh chuan (a ziaktu telin) kumin, 2023 kumthar lo thlengah hian thil reng reng; mi chanchin emaw, kan chanchin a ni emaw, a sawina tur hmun kan thlan thiam theih nan fimkhur leh zual ila, a hun leh a hmun thliar thiam leh zual ang u hmiang.

 

Hetianga kan tih ngat chuan nasa takin hma kan sawn ang.